A ordená ámbos partido karga ku nan gastunan di e proseso den korte

WILLEMSTAD.- Korte a dikta sentensia den e kaso ku e coach Bicentini a kuminsá kontra federeashon di futbòl di Kòrsou, FFK. Korte a ordená ámbos partido pa karga ku gastunan di e proseso.

...Remko Bicentini pa bin bèk komo entrenadó di Kòrsou...

Ta trata e kaso di terminashon di akuerdo entre Bicentini i e federashon di futbòl FFK. E akuerdo a finalisá 30 yüli 2023 pero tin algun faktura ku no ta pagá ainda. Tabatin un akuerdo entre Bicentini i FFK ku a drenta na vigor 16 ougustus 2022 ku durashon di kuater aña. Bicentini a okupá e puesto di coach di e tim nashonal di futbòl di Kòrsou.

Partidonan a bai di akuerdo ku lo paga Bicentini 66.000 euro pa aña repartí den 12 luna 5500 euro pa luna. Tambe e ta risibi 3500 euro pa partidonan di Fifa Window. Tambe lo paga bónùsnan. E akuerdo a finalisá, pa medio di karta di 30 yüli 2023.

FFK ta rekonose ku mester paga Bicentini 9 luna mas pa un total di 49500 euro. Solamente ku FFK a konta solamente e pago básiko i no a konta e Fifa Window ku ta suma un total di 14000 euro pa e periodo di 9 luna. Ta bin aserka segun Bicentini ku FFK ta hopi atras ku pagonan. Di e 12 fakturanan pa un total di 92.935.58 euro FFK a paga solamente 38.885.14 euro. Segun Bicentini FFK mester page ainda 117.621.68 euro.

Entretantu FFK a hasi dos pago unu di 5 sèptèmber i un otro di 6 sèptèmber 2023. Respektivamente 74.900 euro i 24.347.92 euro.

Desishon di korte ta pa kada partido mes kubri su gastunan di  e proseso den korte. Korte ta konsiderá e gastunan ku Bicentini a hasi pa e kaso tabata prematuro i no nesesario.

Korte ta disidí ku FFK mester paga Bicentini e suma di 18.373.76 euro plùs e interes pa lei ku ta konta for di 8 ougustus 2023 te na momentu ku e pago tuma lugá. E veredikto te ehekutabel mesora.