WILLEMSTAD.- Korte di promé instansia, un bia mas proforma, a trata kaso di e asesinato di e dama venezolano Niloa Delgado Castillo, ku a keda asesiná dia 12 di mart 2020 den kaya Silantro. Ya kaba tin un aña ku e dama a keda asesiná i ainda korte falta algun detaye.
Pa ku e kaso aki, e hòmber Bonifacio ‘Junni’ Roosje di 64 aña, ta keda sospechá di a kometé e asesinato. Segun e akusashon, e hòmber lo a forsageá ku e dama, chok’e ku e konsekuensia, ku el a stek muri. Fo’i promé dia di e tratamentu di e kaso, tambe proforma, Rooje a bisa hues ku e no tin nada di aber ku e asesinato. E ta insistí ku hustisia tin ku kulpa otro hende pa e echo horendo aki.
Esaki tabata e motibu, ku korte a hasi un petishon pa buska e testigu klave di fam Koeiman, pa testiguá den e kaso aki, pero polis por a lokalis’é niun kaminda. Esei a pone, ku korte a bolbe bai di akuerdo pa posponé e kaso.
Riba e dia enkuestion, polis ku a yega na e sitio, a haña e dama drumí den un kamber, riba un kolchon tur na sanger rònt su kurpa i tambe na su boka. Polis a konfiská un bòter di binager, ku tabata habrí banda di e víktima. Despues di a hasi un investigashon, polis a detené e akusado Roosje.
Rooje a splika ku e tabatin un relashon ku e dama i ta e djamars promé ku el a fayesé el a mir’e, despues e no a mir’e mas. El a bisa ku no ta kuadra ku e tabata serka e dama e djárason ku nan a mat’e. Hues a bisa e akusado, ku e mes a deklará ku e djárason promé ku nan a asesin’é, el a papia vários bia kuné na telefòn. Segun hues, polis a saka afó, ku e dia ku nan a asesiná Niloa, e mast di telefòn, a mustra ku Roosje tabata 3 ora den área di e bibienda di e víktima.
Roosje a bisa, ku e dia ei bèrdat e tabata den bisindario di e dama su kas. El a splika ku e ta drecha outo i un dama ku ta biba banda di kas di e víktima, a yam’e pa e wak su outo pe. Despues di esei, el a bai kas. E no ta kòrda nòmber di e dama ku el a bai drecha outo pe.
E dama víktima tabata biba den un kas, kaminda e tabata kuida un hòmber di edat avansá ku ta paralítiko. Den e kas, tambe tabata biba un otro hòmber di fam Koeiman, kual e dama tabatin un relashon kuné. Aparentemente Roosje tambe tabatin relashon ku e dama. E hòmber paralítiko a deklará tantu na polis komo den sala di korte, ku e anochi ei el a tende un gritamentu den e kas, entre e dama ku un hòmber. Den e gritamentu, el a rekonosé e stèm di Koeiman. Despues di un ratu, a reina un silensio i no a dura mashá ku Koeiman a bin bis’e ku e dama a mata kurpa. E hòmber paralítiko a wak Roosje den sala di korte, pero a bisa ku e no konosé.
Polis ku a hasi un investigashon, a haña rastronan di dede di Roosje na vários parti di e víktima su kurpa. Entre otro na kara, garganta i na banda robes di e kurpa. Tambe polis a haña DNA di Roosje, bou di e uñanan di e víktima. Riba e T shirt ku e dama tabatin bistí, tambe polisnan a haña rastronan di dede di Roosje.
Pa loke ta trata Koeiman, e tim di investigashon a haña rastronan di su dede na dos parti di e kurpa di e víktima. Koeiman a deklará na polis, ku esei ta pa motibu ku el a trata na bòltu e víktima, ora el a kaba di kometé e suisidio. E prosèsverbal di polis a relatá, ku na momento ku e asesinato tabata tumando lugá, Koeiman su telefòn tabata mustra den área di Punda.
Roosje na vários okashon, a keda ripití ku e no tin nada di aber ku e kaso i ku e ta será inosentemente. Hues a bisa ku ta bolbe bai hasi un intento na Koeiman pa e bin testiguá. Pero si esaki no resultá, lo laga polis bai busk’e i trese korte pa e deklará sea na bon òf na malu. E kaso a keda posponé, pa dia 27 ougùstùs binidero.