WILLEMSTAD.- Den kuadro di e temporada di kuaresma e integrantenan hóben di Krea Dansa i Krea Dansa 4 Kids, bou di direkshon di Dennis Puriël a hasi un gesto masha bunita na e abitantenan di e kas di kuido Betesda.
Ta asina ku tur aña di nobo den e temporada aki e gruponan ariba menshoná, ta bishitá un instansia ku mayoria biaha den nos komunidat no ta risibí un bishita frekuentemente di artistanan òf personanan òf ni sikiera nan propio famianan.
Netamente pa esaki e gruponan aki en kuestion ta hasi e bunita gesto aki, di regalá un instansia un presentashon grátis.
Mester bisa ku for di chikí ta mustra e hóbennan e importansia di kòrda tambe riba esnan ku den nos komunidat mayoria bes ta wòrdu lubidá. Nan por mira atras riba un mainta masha eksitoso i e abitantenan tambe a keda masha kontentu i a pidi pa bolbe ripití esaki.
Riba kombinashon di e pòrtrètnan por mira kon e ambiente tabata.