WILLEMSTAD.- Pa di 9 aña konsekutivo Krea Dansa i Krea Dansa 4 Kids ta presentá nan show anual. E aña aki e show ta titulá ‘The Secret’ i lo ta un biaha mas bou di direkshon general di Dennis Puriel.
E tradishon di Krea Dansa durante dje último 9 añanan komo grupo di baile ta presentá un show di baile pa sera aña.
‘The Secret’, e tema dje aña aki ta basá riba e filosofia ku pa siglonan kaba ta den nos universo, pero ku hopi hende no sa di dje.
Den e show dje aña aki tin diferente kuminda pa pensamentu, mensahenan ku ta laga bu keda ketu i pensa pa na final ora bo sali for dje show, bo por apliká tur loke bo a eksperensiá durante dje show den bo bida diario.
Lo bai tin tres funshon di ‘The Secret’ den La Tentashon riba dianan 8 i 9 di desèmber. Riba ámbos dia lo tin un presentashon pa 8’or di anochi i riba djadumingu lo tin un matiné pa 4.30’or di atardi spesial pa muchanan.
Entrada pa e presentashonnan di anochi ta kosta 20 florin i e matiné ta 15 florin pa persona. Pa mas informashon i karchi por yama 674-0262 òf 520-3287.