WILLEMSTAD.- Heinrich Pieter, konosido kantante ta e presidente di e komishon organisadó di Festival di Tumba Hubenil 2020. ‘Richie Rich’, manera e ta keda popularmente yamá, tin un reto su dilanti i e ta kombensí ku e vishon ku e tin pa loke ta trata Festival di Tumba Hubenil ku lo e logra esaki huntu ku su tim ku ta trahando duru pa brinda Kòrsou un tremendo Festival.
Rich Pieter a kompartí su algun palabra relashoná ku e Festival: “Komo mucha, for di ora temporada di karnaval yega mi tabata sinta klabá dilanti televishon pa mi wak nos Festival di Tumba Hubenil. Pa mi semper tabata un sensashon di mira kon un mucha ta keda koroná komo un Rei o Reina.  Mi tabata imaginá mi mes kon e mucha ei lo tabata sinti e siguiente dia  na kas, skol, den bario i den komunidat.  E soño di por a bira un Rei di Tumba Hubenil semper tabata biba den mi pero e oportunidat i e parti finansiero no tabata na mi disposishon pa por a logra esaki.    Awe mi tin un reto mi dilanti. Organisá E festival ku for di chikí mi tabata atmirá. Mi vishon pa ku edishon 40 di Festival di Tumba Hubenil ta pa krea un plataforma kaminda ta duna nos hóbennan e oportunidat pa eksplorá nan talento i sigui desaroyá esaki.   Tumba hubenil ta un mashin ku atraves di añanan a sa di produsí artistanan na nivel, ku te awe ta profilá den nos farándula lokal. Nos no por lubidá riba e artistanan ku a sa di representá nos isla riba tarimanan internashonal. P’esei pa ami ta un plaser i honor di por ta forma parti di e mashin aki. Danki na Juni Aniceta pa e oportunidat i e konfiansa depositá den mi persona, pa por karga un tarea di e gran magnitut aki. Un Danki di kurason ta bai na e tim dinámiko i hóben pará mi tras, ku a sa di demostrá na ami i pueblo di Kòrsou, ku nos yunan di tera tin talento na gran eskala”.