Krioyonan den MLB (1 di Òktober)

Deporte

Kenley (Dodgers) i Jonathan (Brewers) kampion di nan respektivo divishonnan

Kenley Jansen (Dodgers) a kaba e wega di ayera pa Dodgers titulá kampion di Divsihon West di Liga Nashonal pa di 6 temporada sigui. No tabata un situashon di salba wega. Kenley a tira 1 ining permití 2 hit, 2 kareda i poncha 2 bateadó. Awor Kenley i Dodgers lo bai topa Ozzie Albies i Braves na kas den Seri di Divishon ku ta mihó di sinku ku ta inisiá djaweps awor.

Jonathan Schoop (Brewers) a bai di 4-0 ayera den wega ku Brewers a titulá kampion di Divishon Sentral di Liga Nashonal. Awor lo sinta warda wak ken ta bira e ganador di e wega di Wild Card entre Chicago Cubs i Colorado Rockies ku ta tuma lugá awe. Brewers lo topa e ganador den Seri di Divishon djaweps awor na kas.

Didi Gregorius (Yankees) Didi i Yankees lo kuminsá post temporada mayan ku wega di Wild Card kontra di Oakland Athletics na kas. Ganadó ta sigui i pèrdèdó ta bai kas. Den entrevista Didi ta indiká ku e ta kla pa e wega.

Xander Bogaerts (Red Sox) ta sinta warda awor wak kua ekipo nan ta bai topa den playoff djabièrnè. Esei sea lo bira New York Yankees of Oakland Athletics.

Ozhaino Albies (Braves) ta kla pa enfrentá su paisano Kenley Jansen i Dodgers den e Seri di Divishon mihó di sinku ku ta ranka sali djaweps awor na Los Angeles.

Jurickson Profar (Rangers) temporada a finalisá i Profar por mira bek riba un bon temporada. No solamente na bate pero den defensa tambe hungando tur posishon den kuadro pa e ekipo di Rangers. Profar a kaba ku un averahe di .254 ku ta produkto di 133 hit den 524 turno na bate. El a empuhá 77 kareda i anotá 82. E ta entre e lidernan den vários kategoria ofensivo di su ekipo. Lider den doblete i tripel konektá. El a konektá 20 honron, 35 doblete i 6 tripel, roba 10 base. Despues di vários temporada di a sufri di leshon, Profar a hunga un temporada kompleto i demonstrá su balor na e ekipo

Andrelton Simmons (Angels) temporada a finalisá i lo ta kandidato fuerte un biaha mas pa bai ku wante di oro komo mihó shortstop den Liga Amerikana. Simmons tabatin bon temporada na bate tambe finalisando ku un averahe di .292 ku ta produkto di 162 hit den 554 turno na bate. El a konektá 11 honron, 26 doblete i 5 tripel. El a empuhá 75 kareda i anotá 68, roba 10 base tambe. Simmons su manager a tuma retiru pues lo ta un off season interesante pa Angels.