Krioyonan den MLB (16 di Òktober)

Deporte

Kenley (Dodgers) ta igualá i Bogaerts (Red Sox) ta tuma bentaha

Jonathan Schoop (Brewers) a mira akshon pa promé biaha den playoff final di Liga Nashonal i a bai di 5-0. Den di nobeno ining Schoop a topa mano a mano den bataya di krioyonan i Kenley a dominá su kompatriota ku un roling mansu ku Kenley mes a hasi un tremendo hungada riba dje pa saka schoop out na primera. E seri aki awor ta empatá na 2-2. Awe lo tin e último wega na Los Angeles i ta programa pa kuminsá 5:05 pm promé ku e seri move bek pa Milwaukee. Promé ku wega Schoop a risibí un bolo di Machado di los Angeles Dodgers pa su aña. Apesar ku nan ta kontra di otro awor. Machado i Schoop ta bon amigu ya ku nan a hunga hopi aña huntu den e organisashon di Orioles

Kenley Jansen (Dodgers) pa promé biaha e temporada aki a tira dos ining i tabata krusial pa tene su ekipo den wega. Kenley a picha e di 9 i 10 ining sin permití kareda i solamente 1 hit. El a poncha 2 bateadó i duna 1 base por bola. Dodgers i Kenley a gana di Brewers i Schoop pa asina igualá e seri na 2-2. Awe lo tin e wega di deskite i esun ku sali viktorioso falta e ora ei un viktoria mas pa bai Serie Mundial. Dodgers lo bolbe purba ku Kershaw (9-5, 2.73 era) riba montikulo

Xander Bogaerts (Red Sox) a bai di 4-1 ku 1 kareda empuhá i 1 base por bola risibí. Red Sox ta pika dilanti den e serie aki di mihó di 7, 2-1. Awe e seri ta kontinuá ku Porcello (17-7, 4.28 era) riba montikulo pa Boston. Promé lansamentu na Houston lo ta 8:39 pm.