Krioyonan den MLB (25 di Sèptèmber)

Deporte

Schoop i Brewers na 1 viktoria pa yega post temporada

Jonathan Schoop (Brewers) a bai di 3-1 ku 1 kareda anotá ayera i ku bunita hungada den defensa ku man bashí. Number mágiko pa Brewers yega playoff awor ta na 1. Esei ta nifiká 1 viktoria mas pa Brewers i e ekipo di Schoop ta den post temporada. https://www.mlb.com/brewers/video/schoops-barehanded-play/c-2503948483

Ozhaino Albies (Braves) a bai di 4-1 ku 2 kareda empuhá riba su di 24 honron di temporada.

Didi Gregorius (Yankees) tabata bek den tereno di wega praktikando su fildeo ounke ainda e no a kuminsá tira bala. Didi a indiká ku e ta sinti un mehorashon den si pòls. “E pòls ta mihó ku ayera i esei ta un bon señal. Mi ta spera nan laga mi hunga mas lihé posibel,” tabata palabranan di Gregorius. Awe dòkternan di ekipo lo reevaluá Didi

Andrelton Simmons (Angels) a bai di 4-1 ayera i un biaha mas ta bria den defensa.

Kenley Jansen (Dodgers) no a mira akshon ayera. Number mágiko di Dodgers ketu bai na 5. Apesar ku Kenley no a hunga ayera, e tabata den notisia na momentu ku el a duna di konosé ku e lo mester keda someté un biaha mas na un operashon pa su problema ku kurason. E closer di Los Angeles Dodgers, Kenley Jansen, a bisa si ku e lo wanta ku su operashon te despues di Seri Mundial si e ekipo mester yega asina leu.