Bogaerts: “Nos tin un di e mihó ekiponan den historia”

Xander Bogaerts (Red Sox) a bai di 3-1 i 1 base por bola risibí. Xander den su karera relativamente hóben ainda ya a gana su di dos renchi di kampion mundial. Den e post temporada aki e tabatin un average di .224 ku 13 hit den 58 turno na bate ku 7 kareda empuhá i 5 anotá.  El a demostrá sigur su balor pa Red Sox i komo e úniko hungadó aktivo ku tabata forma parti di e último título mundial di ekipo. Bogaerts ta drenta off season mirando bek riba un tremendo temporada 2018. Esaki ta e di 9 título di Boston Red Sox i di 4 for di 2004. “Nos no ta arogante pero nos sa ken nos ta. Nos tin un di e mihó ekiponan den historia i sigur den historia di Red Sox”

Kenley Jansen (Dodgers) tabatin su di tres aparishon den World Series 2018 ayera i a tira un ining sin permití kareda ni hit. Al final Kenley por mira bek tòg riba un seri un poko desapuntante na momento ku na dos okashon e por a salba wega pa Dodgers i a no a logra esaki. Kenley lo tin un off season pa atendé ku su salu i bin bek aun mas fuerte den 2019. Den e post temporada aki el a tira 10.2 ining i tabatin un era di 1.69. Kenley a salba 3 wega i poncha 13 bateadó. Dodgers tabata den nan di dos Seri Mundial tras di otro i ámbos a kaba den desapunto. Ya a bira 30 aña kaba ku Dodgers a gana nan último título. Lo no bai ta un  off season fásil pa e ekipo

Play of the Day