Krioyonan den MLB (29 i 30 di Sèptèmber)

Deporte

5 krioyo den post temporada di MLB

Kenley Jansen (Dodgers) djasabra a tira dos tèrsio di ining permití 1 hit i poncha 1 bateadó. No tabata un situashon di salba wega. Ayera no a mira akshon. Dodgers awe lo topa Colorado Rockies na kas pa determiná ken ta gana e divishon West di Liga Nashonal i kua ekipo lo tin ku bai hunga e wega di wild card mayan. Pues un wega sumamente importante pa Kenley i Dodgers awe.

Ozhaino Albies (Braves) tantu djasabra komo djadumingu a bai di 4-0. Awor Ozzie ta bai prepará su mes algun dia pa inisio di post temporada unda Braves lo sea topa Colorado Rockies of Los Angeles Dodgers den promé buèlta djaweps awor.

Didi Gregorius (Yankees) djasabra a bai di 3-1 ku 2 kareda anotá i ayera no a mira akshon. Didi i Yankees lo kuminsá post temporada djárason ku wega di wild card kontra di Oakland Athletics.

Jonathan Schoop (Brewers) djasabra a bai di 4-2 ku 1 kareda empuhá i 1 kareda anotá. El a konektá su di 22 doblete di temporada. Ayera e no a mira akshon. Schoop i Brewers ta hunga nan promé wega di post temporada, un wega di deskite awe kontra di Cubs pa disidí e kampion di divishon Sentral di Liga Nashonal.

Xander Bogaerts (Red Sox) no a mira akshon djasabra i ayera a bai di 3-2 ku 2 kareda empuhá i 1 kareda anotá. El a konektá su di 23 honron di temporada i su di 45 doblete. Bogaerts i Red Sox ta sinta warda awor wak kua ekipo nan ta bai topa den playoff djabièrnè. Esei sea lo bira New York Yankees of Oakland Athletics.

Jurickson Profar (Rangers) djasabra a bai di 5-2 i ayera a drenta komo emergente i a bai di 1-0. Profar i Rangers no a logra drenta post temporada i awor ta bai prepará pa 2019.

Andrelton Simmons (Angels) djasabra a bai di 4-1 ku 2 kareda empuhá i ayera no a mira akshon. Simmons i su temporada a kaba i na mes momentu e manager di Angels, Mike Scoscia a tuma su retiru. Ta premirá ku lo tin kambionan grandi ta bai tuma lugá den e ekipo aki den preparashon pa 2019.