DENVER.- Bon fin di siman pa Jurickson Profar. El a bai di 12-4 ku 2 anotá. Miéntras ku den tur tres wega di fin di siman el a logra yega base. Esaki ta nifiká ku el a ekstendé su racha di weganan konsekutivo yegando base na 25 wega. Huntu ku esakinan e tin un promedio di 333 den su último shete weganan. Su promedio e temporada aki awor ta di 230 ku 5 honron i 15 kareda empuhá.

Kenley Jansen (Boston Red Sox)

E fin di siman tras di lomba tabata difísil pa Kenley Jansen. E último dos aparishon pa Kenley lamentablemente no a bai bon. E tabatin dos “blown save” i tambe dos wega pèrdí. El a permití sinku kareda, 4 hit i regalá 4 base por bola. Miéntras djasabra e tabatin tres violashon di “pitch timer”, ora ku entre otro Wilson Contreras lo a brua su konsentrashon.

Ozhaino Albies (Atlanta Braves) 

Ozhaino Albies ku un fin di siman relativamente ketu ora el a bai di 11-1 ku 2 empuhá. Sinembargo e úniko hit di e segunda base yu di Korsou tabata un honron djadumingu.  Su promedio awor ta na 259 ku 10 honron i 29 kareda empuhá.

Xander Bogaerts (San Diego Padres) 

Xander Bogaerts  a bai di 12-3 den fin di siman pa Padres. E shòrtstòp di Aruba ta habri siman ku un promedio di 265 ku 6 honron i 15 kareda empuhá.

Jonathan Schoop (Detroit Tigers)

Jonathan Schoop a probechá di e turnonan ku el a haña den fin di siman. E orguyo di St.Maria a bai di 4-2 ku un anotá den fin di siman tras di lomba. Ku esaki Jonathan a subi su promedio awor na 213.

Ozhaino Albies ( d) selebrando su honron ku Ronald Acuña Jr (r)