Kenley kla pa ‘spring training’ despues di operashon eksitoso

 
Kenley Jansen (Dodgers) a kompletá su operashon di kurason ku éksito ayera i despues a pone un video kòrtiku den kual e ta manda un mensahe ku tur kos ta bayendo bon. “Danki na boso tur pa tin mi den boso pensamentu i orashon i tur e mensahenan ku mi a risibí.”  Esaki tabata e di dos prosedura di kurason den último 6 añanan pa Kenley.  Den un komunikado ku e ekipo di Dodgers a emití ta bisa ku operashon a bai segun plan i ku Kenley lo ta kla pa spring training i disponibel pa apertura di kampionato Liga Grandi 2019.

Thank you for good thoughts, kind messages and prayers. 🙏🏽 @Dodgers @mlb #ChristmasSpirit #StrongerThanEver2019 pic.twitter.com/yPwuRL4sJ5

— Kenley Jansen (@kenleyjansen74) November 27, 2018

Jonathan Schoop (Brewers) pa fin di e luna aki lo tin klaridat kiko ta bai pasa na momentu ku su ekipo Milwaukee Brewers tin ku disidí ki paso nan lo tuma pa ku e pelotero yu di Kòrsou. Schoop ta eligibel pa arbitrahe. Schoop a yega Brewers den un kambio i nunka no a kue su ritmo ku su ekipo nobo. El a atmití ku e tabata pusha su mes di mas pa trata na impreshoná su kompañeronan di ekipo nobo. Den último parti di temporada i playoff, Schoop tabata mas tantu riba banki ku den wega.

Na Taiwan

Roger Bernadina i Kia Tigers a finalisá nan relashon di trabou. Awor Bernadina ta en buska di un ekipo profeshonal nobo

Liga Independiente

Sharon Martis ayera a firma un kontrakt nobo ku e ekipo profeshonal di Liga Independiente, Lincoln Saltdogs. Temporada pasa tambe Martis a picha pa e ekipo aki i a finalisá ku un era di 5.01 den 41.1 ining. Último biaha ku Martis a picha den Liga Grandi tabata na 2013 ku e organisashon di Minnesota Twins

...Shairon Martis...