CARACAS, AP.- E parke Nashonal El Avila, kual tabata un ikono i pulmon natural di Caracas durante vários dékada, a transformá den un gran baño públiko kaminda vários ta akudí diariamente pa baña, laba paña i kolektá awa pa enfrentá e falta di servisio provoká pa e interupshonnan kontinuo di koriente i awa.
E presensia di habitantenan afektá pa e skarsedat di awa provoká pa e blackout nashonal riba 7 di mart i interupshonnan kontinuo registrá desde e fecha aki a kousa preokupashon entre ambientalistanan, kual ta teme ku e transformashon di El Avila den un baño públiko ta generá dañonan ku no por drecha mas.
Tin diferente espesie di animal ta biba den El Avila su mondinan.
“Mi no por a imaginá mi ku un dia lo i mester baña na El Avila, pero nesesidat no ta laga espasio pa opshon”, asina un persona a bisa, kende a rekordá ku ántes e tabata bishitá e parke pa kana i inhalá e aire puru.
Un funshonario di Instituto Nashonal di Parke estatal, a atmití ku outoridat ta konsiente di e riesgo pa medioambiente. Pero el a agregá ku su labor ta pa garantisá akseso na awa i sòru pa tur kos kana sin problema i boroto.
