WILLEMSTAD.- Hit di oro konektá pa Michenou Marselia den bòm di oktavo inning a manda kareda di viktoria ‘home’ pa Kòrsou ayera nochi gana 6-5 di Brazil i titulá kampion Suramerikano di sòftbòl femenino. E ekipo di Kòrsou a logra lo máksimo den e kampionato regional ku a keda hungá na Guayaquil, Ecuador. Pa di dos anochi siguí Kòrsou a bai extra inning i ta laga e ekipo kontrario den tereno, ku e diferensia ku e resultado di ayera a nifiká konkista dje título.

Dos ekipo fuerte a topa otro ayera nochi den e gran final. Brazil atardi a gana di Colombia pa gara e pase pa final kontra di Kòrsou.

...Michenou Marselia; el a bati e hit di oro pa manda kareda di viktoria kas...

Promé inning fásil

Loke den promé inning a parse di lo bira un wega fásil pa Kòrsou, a resultá un berdadero doló di kabes pa wak strategia di coaching mester a trese solushon.

Den promé entrada Kòrsou a bai ariba 3-0. Promé kareda riba passedball, e siguiente den tremendo hugada di doble robo i e terser riba hit di Jandely Ricardo.

Shanna Te Vrede a lusi bon e promé tres entradanan ounke el a tuma un kareda den di tres. Den di kuater Brazil ta menasá i Nella Elizabeth ta tuma bala pa plakia kos. Sinembargo, base por bola, hit i eror ta permití dos kareda pa Brazil empatá e partido.

Seguidamente Elizabeth i e picher brasilero ta keda fuerte i ta pinta blanku riba scoreboard. Brazil ta krea oportunidat den di seis, pero Kòrsou ta saka tremendo doubleplay. E inning siguiente e brasileronan ta paga Kòrsou ku e mesun moneda, esta doubleplay pa sera inning.

...Jandely Ricardo; hit empuhadó den tantu promé komo oktavo inning...

Ya den bòm di séptimo Kòrsou a haña oportunidat pa disidí e wega, pero ku dos koredó na base i un out tòg no ta logra skor i e wega a bai extra inning.

Den kabes di ocho Brazil ta skor 2x. E promé riba tripel i e di dos riba toke di sakrifisio, loke ta pone Korsou ku lomba kontr’i muraya.

Pero un biaha mas Korsou ta bin bek fuerte. Un eror defensivo ta keda kastigá ku hit di Ricardo pa hasi e wega 5-4. Despues di un ponche, Kimberly Agard ta yega base riba fielders choice pero e kareda di empate ta skor: 5-5. Ku esei a krea espasio pa Marselia disidí e wega i e ta hasi esei riba e promé lansamentu ku ta bin ‘home’: Kòrsou kampion!

Presidente di federashon di sòftbòl (CSB) Lernnerth Angela, ku kopa di kampion i flankiá pa e rumannan Xiarysse i Shanysse Emerenciana.