WILLEMSTAD - Resientemente Rivaldo Da Camara a firma pa un beka pa hunga futbòl na Thomas University ku ta situá den e estado Georgia na Merka. Rivaldo Da Camara semper a hunga futbòl den klup di Willemstad, kaminda último aki e a hunga den promé i segundo divishon.

Rivaldo a gradua ku HAVO diploma for di aña pasa na Radulphus College, pero mientrastantu ku e tabata buskando un universidat e a pasa pa kompletá su 5 VWO tambe. Ku asistensia di Curacao Athletic Scholarship Foundation (CASF) e a logra haña e mihó beka posibel kaminda e por a skohe for di diferente universidat ku a dun’e un oferta. El a opta pa Thomas University basa riba e rèkert di futbòl di e universidat den nan konferensia i tambe a base di e ranking akadémiko. E talento di Rivaldo tambe a yud’e pa risibi e premiashon di EYoung Talent Fund ku a keda otorgá pa promé biaha e aña aki ku e meta di yuda hóbennan talentoso finansieramente pa logra nan metanan. Prins Bernhard Cultuurfonds a koordiná e proseso. Esaki tambe a yuda Rivaldo pa por kubri su gastunan di estudio i vivienda na Thomasville, Georgia. Durante un aktividat ameno na e restaurant “E Konfo” na Asiento, famia i amigunan por a presensia su firmamentu di su kontrakt di beka. Rivaldo mester raporta kaba dia 31 di yüli pa trainingnan preparando pa e temporada ku lo kuminsá pronto. E soño di Rivaldo ta pa hunga futbòl profeshonal na Merka òf otro kaminda na mundu. Curacao Athletic Scholarship Foundation ta deseá Rivaldo tur klase de éksito na su universidat i su metanan pa futuro.