WILLEMSTAD.- Djadumingu awor, 5 di mei ta fecha pa e Marcha di Seú di Bándabou. Ayera tardi Fundashon Kultural Seú Kòrsou a tene un rueda di prensa kaminda nan a kompartí tur informashon di importansia pa loke ta trata e Marcha di Seú di Bándabou.
E aña aki a bin algun adaptashon pa dje forma ei regla e formashon dje marcha.
Marcha di Seú di Bándabou ta Sali pa 1’or di mèrdia. E apertura, parti di protokòl na inisio dje marcha, lo tuma lugá pa 12.30 di mèrdia.
Atenshon Gruponan
FKSK lo pèrkurá pa sera henter e ruta di Marcha i pone un punto di kontrol na ‘Plenchi Maria Dam’. Einan lo tin un kontrol di vehíkulonan. Despues ku e grupo pasa e kontrol tékniko i di dokumentashon di shofùrnan, e kolaboradó lo kana ku e grupo hib’e na e punto di salida. Ora yega e punto di salida e grupo lo risibí su number di partisipashon.
Ta bon pa informá ku FKSK a indiká ku tur number di Marcha di Seú di Punda a kaduká.
Esaki ta nifiká ku ta den e órden ku bo yega na e punto di kontrol lo bo risibí bo numerashon pa e marcha.
Fundashon Kultural Seú Kòrsou a informá ku lo no pura e marcha i segun nan kalkulo e último gruponan ku lo yega final lo hasi esaki entre 6.30 pa 7or di anochi.
Éksito na tur e gruponan partisipante na Marcha di Seú di Bándabou.