LIMA, PERU.- E departamento nashonal di Imigrashon di Perú a ordená e deportashon di kuater salsero Colombiano, entre nan dos eks miembro di e popular Grupo Niche, esaki pa motibu di realisá konsiertonan sin ta den poseshon di un visa adekuá pa e aktividat, asina e institushon di imigrashon a splika den un komunikado.
E músikonan Colombiano, Arnold Moreno, Alexander Tulande, Wilson Moreno i Jhon Urrutia a keda prohibí pa por drenta Perú pa e próksimo 15 añanan, segun e mesun dekreto di Imigrashon.
E kuarteto di Salsa, ku tabata presentá den diskotèk i otro salanan di baile di Perú bou dje nòmber ‘Niche, el homenaje’ a keda detené pa Polis nashonal di Perú, esaki despues ku nan a kaba di duna un konsierto.
E kuater Kolombianonan a yega Perú dia 15 di yüni i for dje dia ei a presentá na diferente okashon. Segun Imigrashon Peruano, e músikonan a drenta e pais komo turista i no ta permití pa realisá aktividatnan kontra di pago.
Grupo Niche den un mensahe ku nan a pone riba nan página ofisial di Facebook  a kalifiká e grupo ekspulsá for di Perú komo estafado. Mas aleu nan a splika ku Arnold Moreno i Jhon Urrutia a forma pa un tempu masha kòrtiku parti di Grupo Niche, tanten ku Wilson Moreno, ruman di Arnold i Alexander Tulande nunka a forma parti dje organisashon musikal.