WILLEMSTAD – Un famia na Kaya Tanki na De Savaan a pasa den momentunan di gran sustu, despues ku kuater hòmber armá a drenta nan kas durante anochi. E hòmbernan a kibra porta di e kas pa logra drenta, miéntras ku e miembronan di famia tabata paden. Segun informashon ku EXTRA a risibí, tur kuater hòmber ku arma di kandela. Despues ku nan a logra drenta e kas, nan a los bala i menasá e miembronan di famia. E sospechosonan a sigui kibra diferente porta den e kas, inkluyendo porta ku nan a dal ku skòp pa logra habri. Nan tabata aparentemente buskando un kos spesífiko, pero te na e momentu aki no ta konosí kiko eksaktamente nan tabata buska ni si nan a logra bai ku algu. E invashon di e kas a laga e miembronan di famia hopi spantá. Polis a akudí na e sitio pa investigá e kaso i konfiská e huls nan ku a keda atras despues di e tiramentu den e kas. Tambe a solisitá asistensia di ‘Slachtofferhulp’ pa duna sosten na e famia, ku a keda den estado di shòk despues di e insidente. Te na e momentu aki no tin informashon tokante detenshon di e kuater sospechosonan.




Laga un komentario