WILLEMSTAD.- Ayera tardi Roël Calister huntu ku Gyselle Meulens-Petronia di ‘Qube Network’ a duna informashon na prensa relashoná ku e konsierto di ‘Kuenta i Tambú’ ku lo tuma lugá djasabra awor na Villa Maria.
‘Kuenta i Tambú’ a krea un zonido úniko yama ‘Tambutronic’, e lokura i eksploshon kolorido karga ku energia di músika Afro Karibense di nos Dushi Kòrsou.
‘Kuenta i Tambú’ a presentá na North Sea Jazz, Caribbean Sea Jazz Aruba, New York Lincoln Center for Performance Arts, Kennedy Center for the Performing Arts na Washington, djis pa nombra algun kaminda rònt mundu kaminda e formashon músika a presentá. E banda ta kapas pa den algun minüt ku nan kuminsá ku nan presentashon pa pone e públiko kompletu baila.
Resientemente ‘Kuenta i Tambú’ a lansa nan albùm nobo titulá ‘Rais’, di kua e kansion ‘Dutch Major Leaguer’ a bira e kansion ofisial di ‘Curaçao Baseball Week’.
Roël ta splika ku ta despues di 3 aña nan ta bèk na Kòrsou pa duna un presentashon i ku e músikonan aktual ta entusiasmá pa bin presentá kaminda e konsepto dje músika ta originá.
‘E públiko por spera hopi perkushon, hopi bass, hopi bailamentu, p’esei bini ku sapatu pa baila’, asina Roël a splika.
Pa e wikènt aki ‘Kuenta i Tambú’ tin dos konsierto. Un na Aruba riba djabièrnè i djasabra anochi, Ataniro i Zyon lo habri e anochi, siguí pa ‘Kuenta i Tambú’ ku lo pone Villa Maria aribabou.
Karchinan pa e konsierto ta optenibel na Mensing’s Caminada, Van den Tweel na Zeelandia i na porta. Karchi pa sekshon di VIP ta optenibel yamando +5999-525-6999.