WILLEMSTAD.- Djasabra awor, 22 di yüli Kurá di Arte ta presentá ‘Drum Circle’ un show di perkushon ku subasta.
Mas o ménos 20 hóben di 6 te ku 13 aña di barionan serka di Pietermaai, (Scharloo, Zwaan, Nieuw Nederland, Cher Asile i St. Jago) lo presentá un show bibu di perkushon titulá ‘Drum Circle’, esaki den kuadro di e eventonan final di fakansi organisá pa ‘Kurá di Arte’.
Lo ta un show rítmiko espektakular dirigí pa e artista visual Brigitte Anyaene i perkushonista Gregory Kranenburg kendenan a siña e hóbennan pinta i toka e drùmnan ku a keda di spònser pa Selikor.
Despues di e presentashon lo subastá e drùmnan. Tur fondo ku keda rekoudá lo ta na benefisio di e siguiente plan di fakansi di ‘Kurá di Arte. Entrada ta grátis i e evento ta kuminsá pa 5’or di atardi.