KRALENDIJK.- E Yu di Kòrsou Martis di 64 aña mester a responsabilisá su mes den Korte den Promé Instansia riba djaweps 1 di dezèmber último. Ministerio Públiko ta akus’é di a surpasá e periodo di estadia permití na Boneiru. Hues Van Lieshout a presedí e kaso miéntras mr. Blanco a fungi komo fi skal.

E delitu

E akusado na aña 2019 a bin ku fakansi na Boneiru i a hospedá serka famia. Pa lei e ta permití pa keda aki un máksimo di 6 luna. Pues el a surpasá e periodo di\ estadia permití. Konsekuensia di esaki ta ku el a risibí 1200 dòler komo but. “Aunke nos no ta Antia mas, mi ta keda un Hulandes.

Aki ta teritorio di Hulanda. Si mi bai Hulanda i keda mas ku 6 luna no ta duna mi but, tòg? Ami no tabata sa ku e reglanan na Boneiru a kambia,” Martis ta splika.

“Mi ta duna bo un kontesta laf, pero tur hende ta suponé di konosé reglanan. Pero mi por komprondé bo pensamentu”, hues ta bisa. Hues a puntra e akusado kiko esaki ta pensa di e but. “Mi ta haña ku ta kastigá mi dos bia. Mi tin ku paga i ta prohibí mi pa keda riba e isla ku mi ke”, Martis ta kontestá. Tambe el a splika ku e no por paga e montante di but pa motibu ku e no tin trabou.

Hues ta puntra fi skal si tin posibilidat pa baha e montante. “Esaki ta e montante stipulá komo but. Martis mester a mantené su mes na e reglanan. Awor e tin ku paga”, fi skal ta bisa. Hues ta dirigí palabra na Martis. “Bo a tende fi skal. Si bo no paga lo bo bai será pa 48 dia. Kiko bo ke bisa?” “Pa ta sinsero, mi ta preferí pa sinta e 48 dia. Pasombra mi no por paga e sèn ei”, Martis ta ripití. “Bo tabatin sèn pa kumpra ticket pa bini aki”, fi skal ta kuestioná. “Ta un ticket bieu ku ainda mi por a usa”, e akusado ta kontestá.

Hues a haña probá ku Martis a kometé e delitu. “Mi ta kondená bo na un but di 1200 dòler kompletamente kondishonal ku un periodo di prueba di 2 aña.” Despues di skucha su sentensia, Martis a puntra korte si e ta liber pa drenta Boneiru atrobe. “Esei bo tin ku informá na IND”, hues ta kontestá. Tin ku remarká ku Martis ta e úniko persona ku a presentá den korte, pero riba e dia aki korte a atendé un total di 22 kaso di personanan ku a surpasá nan periodo di estadia. E butnan a varia entre 100 dòler i 2500 dòler. Mas largu un persona surpasá su estadia, mas haltu ta e but ku e ta risibí.

Martis tabatin un kombersashon ku reportero di BONERIANO den kua el a ekspresá su desapunte pa ku e reglanan vigente. “Mi stima Boneiru, e kos aki ta duel mi”, e ta bisa. E ta bisa ku for di añanan 70 e ta biniendo Boneiru i nunka ántes el a hañ’e den problema ku hustisia. El a splika ku fo’i 2019 e ta aki pero e no a traha djis disfrutá di su famia i e isla. Ougùstùs último na momentu ku e tabata bai Kòrsou, Koninklijke Marechaussee (KMAR) a detené na aeropuerto. “Aunke Antia no ta eksistí, nos ta keda ruman. Dikon ta implementá e reglanan aki? No mester separá nos, mester bin ku reglanan pa hustamente uni nos”, e ta agregá.