WILLEMSTAD.- E skol, formashon preparatorio di baile Simia Dance Company a haña un kurso di baile folklóriko, durante e 2 lunanan ku a pasa.
Simia Dance Company ta grupo di baile pre-professhonal i ta un departamento di Dance and More Foundation. Aparte di lèsnan obligatorio ku ta konsistí di baile klásiko, jazz, tap i modern dance e alumno ta sigui tur aña eskolar un kurso di baile folklóriko.
Den e lèsnan aki e alumno ta siña e pasonan básiko di e.o. baile di Wals, Mazurka, Seú i Tumba. E lèsnan a ser duna dor di señora Jessy Waal ku ta dosente i bailarina di folklor. E skol: formashon preparatorio di baile Simia ta duna un formashon total di baile pre-profeshonal na hóben talentoso for di 8 aña di edat pa forma parti di Simia Dance Company.
Alabes nan ta wòrdu guiá pa dosentenan kualifiká den e un trayekto pa por hasi oudishon na akademianan di baile den eksterior. Te ku dia di awe, 23 hóben ku tabatin komo meta pa bira un bailarin profeshonal òf dosente di baile, a wòrdu aseptá na e akademianan di baile tantu na Ulanda komo na Merka.
Dance and More Foundation tin kontakto ekstenso ku e akademianan di baile pa di e forma aki keda na altura di nan eksigensianan.
Pa mas informashon di e skol preparatorio di baile Simia, por yama na Fina Dance Art School na 736-5104 entre 2 or di mèrdia pa 7 or di anochi.