Edishon Di Imprenta

Ladronisia di material di trabou i kòmprèser di èrko: Outo a pega kandela na Santa Maria

Komparti:

WILLEMSTAD – Tres insidente separá a eksigí atenshon di polis i brantwer di Kòrsou awe mainta. Den un di e kasonan, ladronnan a kibra un pikòp di kompania Digicel na Montaña i a bai ku diferente material di trabou. Den otro kaso, kuater kòmprèser di èrko nobo a disparsé for di un kompleho di apartamentu riba Koraal Spechtweg. Na Santa Maria, un outo a pega kandela durante kareda, serka di un pòmp di gasolin.

Ladronnan a kibra pikòp di Digicel

Na Kaya John Willekes, den área di Montaña, ladronnan a kibra un pikòp di kompania Digicel i a bai ku basta material di trabou, inkluyendo mashin i otro ekipo ku tabata den e vehíkulo. Riba e fotonan por mira ku un bentana di e pikòp a keda kibra. Polis a tuma keho den e kaso aki. Ainda no ta konosí kuantu material a ser hòrta ni e balor total di e pèrdida.

Kuater kompresor di èrko a disparsé

Den un otro kaso di hortamentu ku a tuma lugá na KoraalSpechtweg, kaminda kuater kòmprèser di èrko nobo a disparsé for di un kompleho nobo di apartamentu. Segun informashon risibí, e doño di e propiedat tabata preparando diferente apartamentu nobo pa pone na hür. Un kompania a bin pa instalá èrkonan, pero promé ku e trabou a ser kompletá, e kuater kòmprèsernan a keda poné pafó di e edifisio. Despues a bin deskubrí ku e kuater kòmprèsernan a disparsé. Un trapi ku tabata na e sitio pa kuminsá ku e trabounan di instalashon a keda para su so bunita asina.  E doño ta buska informashon pa determiná kiko a pasa ku e ekiponan. Tin posibilidat ku kámaranan di seguridat di bisiñanan por yuda aklará e situashon. E ladronisia aki ta un kontratempu pa e doño, pasobra e apartamentunan tabata den fase final di preparashon pa kuminsá hür nan.

Outo a pega kandela serka di pòmp di gasolin

Na Santa Maria, un outo a pega kandela durante kareda, nèt den bisindario di un pòmp di gasolin. E shofùr mes a logra paga e kandela promé ku e situashon a bira mas grave. Brantwer a yega na e sitio pa kontrolá si e kandela tabata kompletamente pagá i a basha un tiki awa komo medida di siguridat. Polis tambe a yega na e sitio. Riba e fotonan por mira ku e parti di motor di e outo a keda seriamente dañá pa kandela. Ainda no ta konosí kiko a kousa e kandela. E tres insidentenan ta separá i te na e momentu aki no tin indikashon ku nan tin relashon ku otro.

Artíkulonan relashoná

Laga un komentario