Update:

KRALENDIJK.- Awor ku nos ta yegando mèrdia e laman na Boneiru ta mas kalmu asina Gunther Flanegien, havenmeester di Boneiru a deklará na EXTRA. Kompará ku mainta e situashon ta mas trankil. Gunther ta papia di un wer hopi inesperá ku niun hende no a premirá. El a indiká na EXTRA ku e mes a manda un alerta di e wer, pero esei tabata mas o ménos 2:30 di mardugá. E ta konsiente ku e momentu ei niun hende no ta bai wak nan telefòn.

Niun hende no a pronostiká ku ta bini un mal wer. Di tur manera e por bisa ku e daño no ta muchu grandi. Tin dos boto ku a subi tera, di kua a subi unu ku kran mesora i a nota ku e no a sufri daño na su bòm. Un yate tambe a subi tera kual despues tambe e doño a laga sak’e riba tera i a nota ku esaki tambe no a sufri daño. Tin un boto ku a los i drif bai den direkshon di Klein Bonaire pero un persona a nota esaki i a mara e boto na un bui. Pues botonan tampoko no a haña muchu daño.

E havenmeester di Boneiru ta papia di un tempu fastioso pa botonan, sigur esnan ku no tabata bon mará. Si no tuma akshon lihé  botonan ta keda bati i esei si por kousa daño.

Laman brutu a kousa basta daño na Boneiru

KRALENDJK.- Un kambio den situashon di tempu a sorprendé Boneiru ayera nochi i awe durante di dia. Laman a bòltu i olanan brutu a kousa daño na botonan na kosta. Den kombersashon ku algun prominente di Boneiru EXTRA a haña informashon ku Boneiru no a haña ningun alerta di posibel mal tempu. Esei mes ta motibu ku doñonan di botonan chikitu no a mara nan boto mas mihó, òf subi esaki riba tera. Manera indiká e laman ta hopi brutu i a sigui brutu te un ratu pasá ku EXTRA a logra haña algun imágen fresku.

Investigando mas aleu EXTRA a komprondé ku kontrol di Meteo na Boneiru ta den man di Koninklijk Nederlands Meteorologisch Instituut (KNMI) i e instituto aki pues ta esun ku lo mester a manda señal di alerta, pero pa un motibu òf otro esei no a sosodé. EXTRA a komprondé ku Meteo na Kòrsou semper ta dispuesto pa brinda servisio, pero KMNI (red. Lesa Ulanda) ta indiká ku nan mes ta sòru pa tur kos.

Na 10-10-10 Boneiru a bira BES i komo tal ta kai direktamente bou di Ulanda komo munisipio ekstraordinario. foto Boi Antoin i Clarck Abraham