WILLEMSTAD.- Lecho23 ta konosí den e farándula komo kompositor, rapper i kantante di e género urbano. Despues di un aña di silensio den e área musikal el a bini awor ku un produkshon nobo, titulá ‘Real Love’.
E piesa aki ta trata di e ups & downs den un relashon i e sufrimentu ku esaki ta trese kuné. ‘Real Love’ ta un kolaborashon di Lecho23 huntu ku Ritmo Real i ta produsí pa 808margiela.
E propósito tras di e piesa aki ta pa konsientisá e oyente tokante kon bo próhimo lo sinti den un relashon tóksiko ku e meta final pa laga hende mustra mas komprenshon pa otro den e área di salú mental i emoshonal. Ta sera e aña ku un vershon bunita i real.
‘Real love’ lo estrená ofisialmente awe, 23 di desèmber, ku un tremendo videoclip riba tur plataforma, es desir youtube, soundcloud, spotify, etc.
Komo un apresio pa su fanátikonan Lecho23 lo manda e vershon ‘Real Love’ na tur e emisoranan lokal pa asina nan oyentenan por yama i solisitá e piesa aki. Pa mas informashon por sigui Lecho23 riba su retnan sosial.