WILLEMSTAD.- Durante fin di siman pasa direktiva, kordinadó i dosentenan di Leerorkest Aruba, Boneiru i Kòrsou (ABC) i un delegashon di Leerorkest Hulanda a reuní ku otro durante un interkambio ku a organisá na Kas di Kultura Aruba.
Leerorkest ta un konsepto ku ta funshoná ku hopi éksito pa 15 aña kaba na Hulanda na diferente skol básiko den diferente siudat. Na 2016 a establesé Leerorkest na Kòrsou, na 2019 a inisiá na Aruba i por último na yanüari 2020 a kuminsá na Boneiru.
Pa medio di Leerorkest muchanan di skolnan básiko ta haña e oportunidat pa deskubrí kon great i mágiko ta pa toka un instrumènt di orkesta pero tambe kon pa toka huntu den un orkesta hubenil i kompañá un koro di mucha.
E konsepto ta basá riba e vishon di Leerorkest: demokratisashon di edukashon di músika. Fundadó i direktor di Leerorkest, Marco de Souza ta konta: ‘Nos ta haña ku músika mester ta aksesibel pa tur hende, pero hopi biaha edukashon di músika ta organisá na un manera ku ta difísil pa yega na dje, pasobra e ta karu òf ta limitá na espasio. Nos ke baha e drèmpel i sòru ku músika ta bira aksesibel pa tur mucha, tambe pa muchanan di ménos rekurso.’
Durante e enkuentro na Aruba a yega na palabrashonnan riba tereno di desaroyo di e trabounan di Leerorkest na ABC den un forma di relashon di trabou mas estrecho ku otro. Mester menshoná ku e relashon di trabou aki ta danki na e apoyo i sosten finansiero di Ministerio di Hustisia i Seguridat Hulandes pa traha huntu na krea un mihó futuro pa nos hubentut.
Na lugá di medidanan represivo ta pone ayudo disponibel pa un programa preventivo den un kuadro “holístiko” di e desaroyo di mucha. Ta proba sientífikamente ku muzik tin un efekto positivo riba inteligensia i abilidatnan sosial di  mucha.
E efekto aki ta originá a base di e echo ku tokamentu di un instrumènt ta stimulá e konekshonnan neurológiko den selebre. Muchanan ku ta toka un instrumènt ta siña diferente habilidat manera traha huntu, apoyá otro, skucha otro, tene kuenta ku otro, warda riba otro i hopi mas.
Ku esaki, partidonan ta uni nan mes pa traha ku otro na un desaroyo sano i na e bienestar di e mucha. Ku e lema  ‘Músika Ta Pa TUR Mucha’ lo kolaborá i interkambiá idea, planifikashon i ehekushon di trabounan, midi eksperensia i resultado di e trabou pa ku e desaroyo di Leerorkest usando e método di Leerorkest Hulanda.
Den esaki klaramente tin bastante espasio pa ‘Karibisá’ e programa hulandes i duna e trabou di Leerorkest su propio identidat. Den esaki lo hasi uso di loke den pasado a uni nos i interkambiá desaroyonan nobo pa kresementu sano di nos muchanan.
Dor di usa e método aki den union, por logra midi e desaroyo i logro. Por ehèmpel na Kòrsou despues di 4 aña i ku un total di mas o ménos 250 alumno ta konta solamente 3 mucha ku a keda sinta.
Interkambio di konosementu i entrenamentu di dosentenan lo yuda desaroyá e “teamspirit” den Reino. A akordá ku partidonan lo traha huntu na un presentashon di Leerorkest pa ku selebrashon di Dia di Reino 2020.
Ku esaki partidonan ta i lo sigui traha na ehekushon di e método di Leerorkest i na un evaluashon konhunto di e logronan.