WILLMESTAD - Ayera e hóben Liam Vinck a yega Poreč, Kroasia pa partisipá den e torneo di tènis Champions Bowl i asina representá Kòrsou.

Liam Vinck di 11 aña di edat a nase na Florida, pero ta yu di dos YDK kual ta Vernon Vinck i Shiara Vinck-Dindial. Aunke Liam a lanta den eksterior, semper el a sinti un konekshon profundo ku Kòrsou. Esaki dor di bishitanan frekuente ku famia i amigunan. Awor e hóben hungadó di tènis ta hiba e amor pa Kòrsou, riba e tarima internashonal di tènis.

E torneo di tènis di Champions Bowl ta un evento mundial sumamente prestigioso. E torneo ta reuní mas ku 200 hungadó di mas ku 30 pais huntu, pa asina nan enfrentá otro den kategorianan di entre 9 pa 16 aña.

Vernon Vinck i Shiara Vinck-Dindial huntu ku nan yu

Liam Vinck su pashon pa tènis a kuminsá na e edat di 6 aña, ora el a kohe su promé ‘racket’. Esaki tabata un regalo di su madrina Eliane Rojer. For di e tempu ei su dedikashon pa e deporte akí a krese, i ku awor e ta pasa 15 ora pa siman ta entrená i prepará físikamente pa oportunidatnan manera esun akí.

Henter su famia i pueblo di Kòrsou ta deseá Liam tur kos bon durante e torneo na Kroasia.