MERKA.- ‘Pa promé biaha mi ta mustra manera mi ta’, asina Christina Aguilera ta sigurá di su albùm nobo ku kua pa di 7 bia den su karera musikal e ta logra yega e Top 10 di Billboard na Merka.
‘Mi a trata di enkontrá mi mes ku e mucha ku mi tin den mi, ku mi bèrdat, ku Christina Maria Aguilera. E proseso a resultá un liberashon kompleto i a pone mi yega na komponé e albùm aki, den kua pa promé biaha mi ta mustra mi mes, manera mi ta’.
E resultado di e ‘liberashon’ no a tarda, dirèkt pa e Top 10 di e lista di éksitonan di Billboard na Merka den su promé siman, i # 1 pa e diskonan mas bendí na Spaña, algu ku e diva di pop no a logra for di su debut, dos dékada pasá.
Pa e grabashon di ‘Liberation’ ku a tuma lugá na Los Angeles, Christina Aguilera a traha ku produktornan, kompositornan i a konta ku kolaborashon di entre otro Kanye West, Anderson Paak i Julia Michaels.
E albùm nobo di Christina Aguilera, un dje ikononan grandi di pop femenino dje último dos dékadanan, ta su di 8 albùm di studio ku e kantante ta produsí for di despues di su debut na 1999 ku e disko ‘Christina Aguilera’, ku a bende mas ku 50 mion di kopia.
Christina ta ganadó di 5 Grammy, un premio Grammy Latino i e tin un strea riba e boulevard di ‘Hall of Fame’ na Hollywood.
Christina ta pendiente pa presentá na Kòrsou durante di Curaçao North Sea Jazz Festival 2018.