WASHINGTON, MERKA, AFP.- E lider di e republikanonan den Senado a sostené presidente di Merka Donald Trump djaluna, kende ta ninga di rekonosé su derota kontra Joe Biden. El a afirmá ku e mandatario “tin derechi” di investigá e denunsianan di iregularidat durante elekshon.
“Presidente Trump tin 100% derechi di investigá e denunsianan di iregularidat i konsiderá akshonnan legal”, segun indikashon di Mitch McConnell den Capitol miéntras Trump no ta rekonosiendo su derota den Merka.
E republikano ta dirigí Senado i a bia ku “si akaso tabatin froude ku a tuma lugá, tur merikano mester ta interesá pa sa esaki. Si e demókratanan tin konfiansa ku esaki no a sosodé, nan no tin niun motibu pa teme un verifikashon adishonal”, asina McConnell a agregá.
Trump i su ekipo ta insistí ku e karera no a kaba i vários legislador republikano a pidi e presidente pa no rekonosé su derota, apesar ku Medionan a proyektá djasabra ku Biden a gana elekshon ku 279 voto elektoral, pasando e mínimo nesesario pa gana kual ta 270.
E mandatario a bisa na vários okashon ku e elekshon tabata froudulento, spesialmente den Pennsylvania kaminda Biden tin un bentaha di 45.000 voto ekivalente na 0,67% segun medionan.
