WILLEMSTAD.- Atleta Liemarvin Bonevacia djárason último a marka tempu di 47.57 den kareda ‘indoor’ na Dusseldorf. ‘Bad Race’, segun e mes a skirbi riba su página di Facebook. Pero e no ta para ketu, su siguiente stòp ta Barcelona.

E atleta yu di Kòrsou a klasifiká kaba pa Kampionato Oropeo ‘indoor’ ku lo tuma lugá di 3 pa 5 di mart benidero na e siudat servio di Belgrado.

Bonevacia djárason último a keda tras di e dos biaha kampion mundial ‘indoor’ riba 400m., e cheko Pavel Maslak. El a kore e distansia na Dusseldorf den presis 46 sekònde.

Bonevacia kende a kaba di regresá for di Pto. Rico, no tabata esküs. “Téknikamente mi no ta kla ainda. Indoor ta hopi otro for di kore na aire liber, i ami ta train kore pafó. “Awor aki mi ta bai Madrid kaminda lo mi train na aire liber i e wikènt aki lo mi bolbe kore ‘indoor’ na Barcelona i djis promé ku kampionato ulandes ‘indoor’ lo mi ta di regreso na Ulanda”, segun el a duna di konosé.

Miéntras tantu, e delegashon di Ulanda pa EK Indoor ta konta ku 8 atleta: Liemarvin riba 400m i Richard Douma riba 1.500.

Serka e atletanan femenino, Lisanne de Witte/400 m., Sanne Verstegen/800 m., Nadine Visser/60 m. hurdles, Melissa Boekelman/ shot put, Anouk Vetter/multi evento, Nadine Broersen multi event.

Algun atleta a anunsiá ku nan ta duna preferensia pa konsentrá riba temporada di zomer i Kampionato Mundial di Londres. Entre nan ta figurá

Dafne Schippers, Churandy Martina i Sifan Hassan.