WILLEMSTAD.- Ya tin 3 edishon tras di lomba i a bira un tradishon ku riba e promé djasabra di aña, Liesella tin su konsierto, ku tin komo meta spiritual, pa habri aña ku Dios i risibí palabranan di inspirashon i orashon di diferente pastor, pa asina nos tin e forsa i sabiduria pa enfrentá tur e desafionan ku por ta spera nos den e aña ku a kaba di kuminsá.  Kada aña esaki a bin ta krese i e aña aki e lo bai ta aun mas spesial.
Komo un eks alumno di Adventschool i mirando e nesesidat di fondo pa traha espasionan pa duna lès mas adekuá pa e muchanan na e skol situá na Mahuma, Liesella a disidí e aña aki pa ban duna Adventschool un man pa medio di e fondonan risibí pa ku e konsierto aki.
E konsierto lo karga e título “Bo ta mi Yudansa” ku ta tambe e título di e ‘single’ ku Liesella a saka resientemente huntu ku Praise Kids. Lo tin diferente artista invitá manera entre otro Milestone, Mariachi Fortuna, Goel, Praise Kids, Song for Jesus, Harmony Brothers, Darlisha Valks, Janea Weert i mas.
E konsierto ‘Bo ta mi Yudansa’ lo tuma lugá na Sentro pa Desaroyo Integral Dr. Israel Leito na Barbadosweg, Buena Vista i ta kuminsá pa 7.30 di anochi.
Karchi ta optenibel na 24 uur uit de muur, Mensing’s Caminada, Kas di Beibel, Beep Beep i na tur Adventschool. Pa karchi pa e sekshon di mesa por yama 668-1356 òf 515-9434.