HULANDA.- Lily Clarisa a outo-publiká su segundo buki, “Illuminated Darkness”, via “Brave New Books”, kual awor ta disponibel riba Internet (pa benta) na AKO, de Slegte i Bol.com.
BIOGRAFIA
Di dia Lily Clarisa ta un maestra di ingles i di nochi e ta un outor, kantante, eskritor i poeta. Na 2015 e a outo-publiká su promé buki di poesia, “Lost Love Poems”, un krónika di e (su) biahenan di amor pa pena di amor.
Un intérprete di arte, e ta konosí pa deambulá di esenario pa esenario pa resitá su arte. El a yega di presentá na e evento “Kosecha Kultural” ku a tuma lugá na Kòrsou, na “Unwanted Words” , “Caribbean Ancestry Club” na Rotterdam, i tambe “Basha Foundation’s Poetry Nights” na Aruba, pa nombra algun.
Tambe, Lily a yega di partisipá komo kontadó di kuenta durante “Aruba’s Children Book Festival 2017”, kual ta organisá anualmente pa “Biblioteca Nacional Aruba”.

LANSAMENTU
Riba 4 di aprel, kual pa kasualidat ta Lily su kumpleaño, lo bai tin un fiesta di lansamentu selebrando e publikashon di “Illuminated Darkness” na Worm den Rotterdam, Hulanda  di 5 or di atardi pa 8 or di anochi. Lo ta bai tin kuminda, premionan di rifa, merkansia di “Illuminated Darkness”, un presentashon kòrtiku di Lily su amigunan poeta, músika bibu i hopi mas; bini unu, bini tur!.

“ILLUMINATED DARKNESS”
“Illuminated Darkness” ta dividí den tres parti; parti unu ta trata abusu infantil, problemanan di famia i soñonan di infansia; parti dos ta konserní PTSD, depreshon, violensia doméstiko, amor i odio; parti tres ta enserá pas interno, terapia, amor propio, esfuerso personal i e podernan pa kura di naturalesa.
Bo por keda aktualisá ku Lily Clarisa riba IG: @lilyclarisawriter òf via, FB: @lilyclarisawriter