WILLEMSTAD.- E departamento di ‘Milieu’ di GMN ku ta enkargá ku kontròl di zonido durante di marchanan di Karnaval ayera nochi a presentá nan plan pa Karnaval 2018.
Pa e aña aki lo instalá un ‘limiter’ riba mixer di tur banda i dj ku ta partisipando den e diferente Marchanan di Karnaval.
E aparato ku ta regulá e zonido di e banda lo sirbi pa evitá ku bandanan òf dj lo surpasá e kantidat di 100 desibèl. Lo kontrolá promé i durante di e marcha segun a keda informá.
Lider di kada grupo ta keda responsabel pa e aparato ku ta keda instalá.
Na e promé okashon ku tuma nota ku e banda no a kumpli ku e reglamento e lider di grupo lo risibí un amonestashon. Na di dos okashon lo e risibí un prosèsverbal ku un but di 300 florin. Na momentu ku pa di tres biaha konstatá ku e banda òf dj a falta ku e reglamentu e grupo lo kontinuá den marcha, pero sin muzik, paso lo saka e banda òf dj for dje marcha.
Mas aleu GMN a informá ku lo kontrolá zonido tambe durante di tur aktividat públiko relashoná ku Karnaval, manera entre otro Jump In. Tantu esnan organisá pa gruponan di Karnaval komo esnan komersial.