WILLEMSTAD.- Djasabra awor, 17 di yüni pa mitar di 8 di anochi ‘Curaçaos Projectorkest’ ta presentá un konsierto klásiko ku un programa variá kaminda baile lo forma un parti sentral dje presentashon.
E orkesta ku lo presentá e anochi lo varia segun nan presentashon di un duo i te un orkesta di 11 miembro.
Bailenan for di tur huki di mundu, manera Habanera, Siciliano, Gavotte, Tarantella i algun wals lo forma parti dje repertorio ku lo keda presentá.
E ‘projectorkest’ ta konsistí di Femke van der Winkel, Martha van Bergen, Carmel Kouprie (viool), Manuela Rios (cello), Judy Sprock, Maril Boersema (flùit), Andrew Solomon (hobo), Hein van Maarschalkerwaart (klarinet i areglo), Enid Lucasius (fagot), John Smit (trompet) i Ilja Huang (piano i organisashon).
Manera ta kustumber durante di mayoria di e konsiertonan, e grupo ta duna talentonan hóben un chèns pa presentá, e biaha aki ta toka turno na Sophie Torres i Lianne van Wilgen pa kanta i Iris Schnog ta laga tende kiko e por tras dje piano.
Entrada pa e konsierto ta grátis i no mester hasi reservashon. Un kontribushon ta keda apresiá i esaki lo wòrdu usá pa organisashon dje siguiente konsierto.
E konsierto ta tuma lugá den koperashon ku Curaçaosche Kunstkring.