SHANGHAI.-E situashon di Corona ta leu for di bou di kontrol. Na China outoridatnan a disidí ku ta introdusí medidanan hopi mas severo, tur esaki den e esfuerso pa kontrolá plamamentu di Covid-19 den e pais. Un bia mas ta e siudat Shanghai ku mas di 26 mion siudadano, ku ta bou di preshon enorme.

Entrante awe djaluna 28 di mart te ku 5 di aprel próksimo tin áreanan, manera Pudong i Puxi, ku lo ta den lockdown total. Ta bai kuminsá e poblashon masal. Lockdown total ta enserá ku no tin transporte publiko ta move, pues nada di taksi, botonan ku ta transporte hende i ni nada. Kompanianan mester laga trahadónan traha na kas di manera ku e poblashon ta keda mas tantu posibel paden. Sentro di Shanghai pa algun aña kaba ta un sentro mundial for di momentu ku kompanianan grandi na mundu manera Tesla, Volkswagen i tambe fabrikante di chep SMIC tur ta establesé na Shanghai. Analistanan ta kalkulá ku e lockdown total aki lo tin su efektonan hopi lihé riba e fabrikanan aki.

E desishon di gobièrnu chines pa introdusí e lockdown total na Shanghai ta debí ku e kantidat di kasonan di kontagio a subi di forma drástiko den un tempu relativamente kòrtiku. Apesar di tur esaki outoridatnan no ke sera e pais kompletu pero ta trata na sera solamente áreanan unda e kontagio ta realmente hopi haltu.