MERKA.- Dos dje pioneronan grandi di Reggaeton, Nicky Jam i Daddy Yankee a bolbe reuní despues di 20 aña di separashon pa duna bida na “Muévelo”, un tema eksplosivo ku ta primintí di dominá radio i plataformanan digital durante di 2020.
Durante di 20 aña e fanátikonan di e artistanan aki a deseá pa ‘Los Cangris’ a bolbe graba un kansion huntu. E wardamentu a kaba i ántayera 8 di yanüari ta fecha ku nan a bolbe marka historia den músika. E re-enkuentro musikal a sosodé bou di produkshon di e rumannan ganadó di Grammy ‘Play-N-Skillz’, Juan i Oscar Salinas, ku apoyo di e kas diskero Sony Music Latin i El Cartel Records.
“Muévelo” ta konta ku un fragmento chikí di e tema ‘Here Comes the Hotstepper’ di Ini Kamoze, ku ta pone bu kòrda e époka di Oro di Reggae, spesífikamente 1994. “Muévelo” ta forma parti dje ‘soundtrack’ dje pelíkula ‘Bad Boys for Life’ ku lo keda estrená dia 17 di yanüari próksimo den sine.
‘Yankee ta mi ruman di bataya, pasado no ta definí ken nos ta awe i hasi nos fanátikonan felis ta e motor prinsipal dje tema’, asina Nicky Jam a afirmá.
Ámbos kantante a traha hopi di aserka den e komposishon dje tema ku a keda presentá huntu ku un video musikal filma den e kayanan di Miami.
Bou di direkshon di Marlon Peña, Nicky Jam i Daddy Yankee ta mustra un video yena ku esenanan dinámiko i ku hopi akshon inspirá riba e kultura di kaya.
‘ Nos kier a bolbe i nos kier a hasié den grandi dunando nos fanátikonan un tema eksplosivo’, asina Daddy Yankee a indiká.
Te ku ayera nochi ya “Muévelo” su videoclip a surpasá 5.9 mion di views den ménos ku 24 ora.