Un djamars bendishoná pa kada un di boso...

Nos a yega e último fecha di Karnaval 2020...

Awe ta ‘Marcha di Despedida’, awe nochi lo tin un selebrashon total pa loke ta trata Karnaval 2020...

Nos gruponan ku a partisipá na Gran Marcha di Karnaval tabata realmente bunita...

Tin algun opservashon chikí, pero esaki importante ta ku un biaha mas nos Karnaval a lusi i nos mester traha riba e detayenan chikí pa dje forma ei sigui skor...

Den nos Gran Marcha tabatin partisipashon di grupo di Colombia, Venezuela, Dominikano, Sürnam, Chines i ku bishita di e barku belero Spaño ‘El Encano’ nos tin tambe partisipantenan di Spaña..

Ayera nochi, ora ku mi a wak e transmishon di TeleCuraçao mi a tuma nota di un entrevista ku Glenn Thomas a hasi ku un persona di Turkia ku a bin spesialmente pa disfrutá i partisipá den nos Karnaval...

Esaki ta loke nos mester sigui hasi, anto esaki ta sin konta e personanan ku ta bin di Aruba, Boneiru, Ulanda i Isla Riba ku tambe ta djòin un grupo i disfrutá di Karnaval...

E aña aki ma tuma nota di hopi Ulandes Oropeo, ku no a djump ku ‘de Nieuwe Limburgse Kabrieten’, pero ku a djòin gruponan popular i a disfrutá tambe di nos Karnaval...

E oportunidat ku algun dje gruponan ta duna pa hendenan no residensia na Kòrsou por inskribí i partisipá ta hasi henter e konsepto di nos Karnaval mas grandi...

E echo ku e aña aki nos a bula 5 mil partisipante ta indikashon ku ounke e aña aki nos ta selebrando e di 50 edishon, pero ta mustra tambe ku nos por sigui krese...

E gruponan ku tin e kapasidat di por produsí un grupo ku por tin 1000 partisipante ta duna bu kaba e indikashon di ki nivel nos tin i por !...

Nos bandanan i dj-nan a hasi un tremendo trabou ku e parti di animashon...

Ma tuma nota tambe dje kontrol ku e departamento di GMN a hasi pa loke ta zonido i a tuma nota di algun banda i dj ku mester a hasi adaptashon pa por a sigui toka...

E kontrol ta bon i pa tur hende disfrutá di un manera sano di e músika...

Nada di mas, nunka no ta bon!...

Un opservashon mi tin di e marcha di despedida hubenil ta e echo ku tin grupo ku ta praktikamente restringí e muchanan di baila...

E kanamentu den rei sin train ni sikiera un koreografia ta pone ku e muchanan di baina ta haña gana di baila...

Mester krea e ambiente ku por ehèmpel e grupo ‘Samba di Ali Ali’ a prekura pe...

Bo por bisa ku e grupo ta sali for di un grupo di baile, pero ta esei te idea, pa e mucha partisipá i gosa...

Na mi opinion tin un par di vehíkulo ku lo tin ku saka for di den e marcha...

E echo ku bo ta ‘branding partner’ di Karnaval mester duna bu e chèns pa move dilanti dje marcha i hasi publisidat, pero no den e marcha...

Demasiado vehíkulo ku ta drenta komo vehíkulo di deskanso òf djis pa sirbi komo promoshon ...

Pa Gran Marcha tabatin e opservashon atrobe ku a ranka e marcha...

Mester wak e pida aki hopi bon, e grupo di ‘stakeholders’ ku ta enkargá ku Karnaval mester wak e punto aki, paso partisipantenan ta reklamá e manera ku ta trèk e Karnaval...

Mi sa ku tin un sistema ku ta kontrolá e moveshon dje marcha i ta kalkulá e spit dje marcha, pero mester evaluá si no ta nesesario pa podisé duna pèrmit pa 1 ora mas i asina bo ta minimalisá e chèns ku ta kore e marcha...

Pa awe nos ta spera ku tur hende disfrutá di e Marcha di Despedida i ku nos komportashon komo públiko lo ta un di kita sombré pe, pa dje forma ei nos tin un Karnaval sigur...

Nos tei move, mayan nos lo tin otro edishon di ‘Louie Louie’ den Karnaval...