Un bon siman pa tur nos lektornan...

Kon a bai ke wikènt? ...

Un tiki áwaseru, pero por lo general públiko tabatin e oportunidat pa disfrutá di diferente evento ku a tuma lugá den wikènt tras di lomba...

Awe ‘DEN E BEMBE’ a kubri basta un par dje aktividatnan...

Awe mainta entre 10 or pa 10.30 lo tin e estreno dje kansion nobo di Boy Thode i Tony Shearman...

Nos tabatin e oportunidat di por a skucha e piesa ayera i mester indiká ku e ta un balada ku letra profundo i ku lo por ta punto di diskushon sigur pa esnan ku gusta sinta analista situashonnan ku ta presentá den bida...

Nan tambe ta pendiente pa un konsierto di Pasku ku lo mester tuma lugá dia 23 di desèmber próksimo...

Grupo di Karnaval “Zoy’é” a hasi un transformashon total di nan trahe pa Karnaval 2019 i a hasi esaki konosí durante di wikènt...

Sigurd i su tim a traha duru i nan konsepto pa Karnaval 2019 awor sigur tei hala atenshon...

Ayera nochi tabata ‘Alo Loco’ ku a presentá nan trahe di Karnaval kombiná ku presentashon di Icons by Gio...

‘Alo Loco’ ta pendiente pa ‘Nos tei gara bo’ den Gran Marcha 2019...

Eksito na ‘Chino’ Moesquit i su tim...

Pa loke ta trata Icons by Gio su debut, nan a ‘sold out’ e fiesta loke tabata di antisipá mirando e interes ku tabatin pa mira e banda presentá ku e front...

‘Louie Louie’ no a bai, e motibu tei...

Loke nos a mira na televishon i skucha no a kai na nos agrado...

E banda ta na altura di esaki tambe pasó no ta poko remarke tabatin riba retnan sosial te ku e kabesante pa pidi klemensia pa su ‘sound man’...

Mi mester remarká ku tin algun artista/kantante tambe ku awó si mester kuminsá bisti na drechi ora ta bai presentá...

Tin hende segun mi ta tira man kue loke ku nan topa den kaminda bistí i bai presentá...

Tin biaha bo tin e impreshon ku nan no ta tene kuenta unda nan ta bai presentá ni tampoko e tipo di fiesta...

Ta manera un amiga a bisa ayera nochi, mi no por ta gasta mas o ménos 500 florin pa mi ta ‘op en top’ pa bai un fiesta, yega haña un kantante den T-shirt...

E tópiko tokante di toka tumba henter marcha i si esaki no sosodé ta saka banda afó ta un deseo ku nunka lo realisá...

Tanten ku bo no ta paga pa e servisio, bo no por imponé niun regla...

Kliente ta rei i doño di grupo mester mantené su mes na esaki...

Mañan nos por sigui diskutí, pa aworakí mi ta bai...

Un siman nobo, pa produsí pa adelanto di nos Pais!...

Te djárason ku Dios ke !...