Un bon siman pa tur nos lektornan...

Un wikènt kargá ku aktividat ta loke nos tabatin...

Fiesta di bachata a bai bon, hendenan a gosa tantu den e lugá komo na kas ku transmishon via televishon...

Promotornan sigur ta disfrutando dje kompetensia ku tin entre plantanan di televishon pa transmití nan eventonan a kambio di promoshon...

Gruponan di Karnaval a sigui ku presentashon di trahe, djabièrnè anochi Entrenous a presentá nan trahe un homenahe na ‘Nelson Madiba Mandela’...

Djadumingu mainta tabata Crazy Diamonds ku a presentá nan ‘Oost West thuis Best’ na nan miembronan...

Ambos trahe tabata bunita i manera kos ta bayendo aki nos lo tin un Karnaval 2019 hopi bunita i kolorido...

By the way, e proposishon pa toka tumba so durante di Marcha ku a keda lansá pa Rignald Maduro i sostené pa AMAK a risibí krítika fuerte den reunion di miembronan di AGKK...

Shon presidente tabata muchu okupá ku partisipashon di su kandidata na Miss International ku e no a sali bin konta e mensahe ku gruponan a dun’é...

Lider di un grupo konosí a lanta i indiká bon kla na e presidente ku bou di niun sirkunstansia no mester aseptá e proposishon aki...

Lider mayó di un grupo ‘GRANDI’ a indiká ku ta ken tei paga tur gastu AMAK òf su miembronan ku tin derechi di eksigí kiko nan ke baila riba dje?...

Diona Angela a gana ‘best body’ na Miss International...

Nos a drenta e siman di ‘Kanto Koral’ i ta pendiente pa durante e siman aki pone énfasis riba e tipo di kanto aki ...

Djasabra awor tin e konsierto anual na Misa di Brievengat ku partisipashon di un kor for di Sürnam...

Esnan lokal konosí tambe lo tei presente pa deleitá e públiko ku nan kanto...

E gran final di Strea Chiki a tuma lugá ayera...

E plataforma pa hóbennan demostrá nan talento un biaha mas a skor bon!...

Un sala yen i hóbennan ku talento riba tarima pa demostrá nan arte...

IBFF tabatin un fin di siman drùk...

Djasabra anochi e representante di Costa Rica, Camila Chinchilla a gana e sertámen di ‘Miss Teen H2O Ambassador’ i ayera nochi tempran e hóben Zarah Lacruz a resultá ‘Mini Beauty International 2018’...

E konsierto di Ilan Chester a kambia di sitio, áwaseru ta pone ku tur promotor ta wak lo mihó pa nan konsierto i nan a tuma e desishon pa move e konsierto pa e ouditorio di PWFC...

Tur kos ta keda mesun kos, awó mas ku nunka mi ta kere ku bo mester buska bo karchi tempran pa bo no keda afó!...

Durante wikènt un banda tabatin presentashon durante selebrashon priva, ta resultá ku e banda no a presentá bon i komentario ta ku e lider di tur tempu dje banda tin ku wak su banda, pasó dje forma ku el a zona no tin nada di ‘klásiko’...

Festival di Tumba Hubenil tabatin su wikènt di evaluashon i pa awe nan a keda pa divulgá e lista ofisial di partisipantenan pa Festival di Tumba Hubenil 2019...

Bon Siman!...