Un felis djárason pa tur nos lektornan...

Mañan Fundashon JAG lo tin nan rueda di prensa kaminda nan lo duna tur informashon relashoná ku temporada di Karnaval 2019 i tambe anunsiá ken ta nan Baluarte i tambe e Pila di 2019...

Great ku Icons by Gio a partisipá ofisialmente na gruponan ku a presentá na e reunion ku JAG ku nan lo ta disponibel pa toka pa 3 grupo hubenil, 2 riba repeater i 1 ku lo tin e banda den e grupo...

E gesto aki sigur ta un di apresiá, e ta yuda 3 grupo i ta yuda JAG tambe ku gastunan pa animashon musikal...

Mayoria grupo di Karnaval a tene nan presentashon di trahe...

Pa esnan ku e presentashon a risibí hopi komentario, nan a pèrkurá pa bai drecha kos i bolbe presentá un adaptashon pa nan miembronan...

Ta interesante pa sa kon e repartishon di partisipantenan lo ta den 2019...

E kalkulo ta ku ta e mesun kantidat di partisipante ta partisipá i ku nan desishon lo ta determinante pa algun grupo...

AMAK ta pendiente pa otro siman pa nan hasi entrega di Premio Edgar Supriano...

Spekulashon di banda di aña den género di kòmbèk ta un basta hot !...

AMAK e aña aki a duna algun miembro di medionan di komunikashon e oportunidat pa duna nan aporte pa yega na e desishon final...

Awó ayera ma mira e formulario di un kolega den medio di komunikashon ku a yega e lista i a ‘reply all’ pa manda su formulario...

Ta interesante pa sa e resultado final i tambe e komentario adishonal...

Nos ta den e siman di Kanto Koral i ta pendiente pa tende djasabra awor, 17 di novèmber pa e konsierto ku ta reuní praktikamente tur grupo di Kanto Koral na Misa di Brievengat...

E maneho pa presentashon di bandanan durante di desèmber pa kuaresma a keda fiha...

Minister a duna dispensashon na artistanan den Reino Ulandes i pa esnan internashonal solamente 1 biaha nan por presentá...

Mi ta di akuerdo ku Minister, pero mi ta di opinion ku mester traha un proposishon di lei pa eliminá e artíkulo 47 di e lei di mantenshon di órden públiko ku ta trata spesífikamente e presentashon di artistanan no residensia na Kòrsou den e periodo ei...

Laga e desishon den man di Minister di Hustisia pa esaki determiná segun merkado te kon leu ta restringí òf permití presentashon di artistanan internashonal...

E motibu di e artíkulo aki ya a ser diskutí i su efekto no ta bálido mas...

Un supliká na Kas di Kultura pa organisá sikiera 1 pa 2 biaha mas e presentashon di gruponan di Aguinaldo i Tambú riba Plasa Brion i Alameda...

Hinka e pueblo den ambiente di Fin di Aña i duna e gruponan tambe un plataforma pa nan por presentá nan mes na pueblo di Kòrsou...

Nos tei move, djabièrnè nos tei bek ku otro edishon di ‘Louie Louie’...