Un felis djárason pa tur nos lektornan...

Nos tabatin algun dia di ousensia, esaki debí na otro kompromiso, pero Louie Louie tei bèk...

Kon a bai e dianan tras di lomba...

Ayera Hunneley a haña ku ta basta i a saka riba Facebook un komentario ku awe ‘DEN E BEMBE’ a kompartí ku e lektornan di EXTRA...

Hunneley a trese su punto di bista dilanti i awor mester ta pendiente pa e reakshon di e otro músikonan...

Ayera ‘Louie Louie’, a risibí algun informashon kaba i loke ta resaltá ta e echo ku no por priva e músikonan di eks Qsign Mellowstreet di traha riba niun otro formashon musikal...

E usamentu di e nòmber ‘Mellowstreet’ no mester ta niun problema dado kaso esaki no a keda registrá...

E ehèmpel klásiko den farándula lokal ta ‘La Perfecta’, despues ku e banda a splet a bin sigur 10 vershon di ‘Perfecta’ riba merkado...

Ke men esei no mester ta un problema, e ta un motibu sentimental ku a usa e nòmber, pero ta algu ku bo por pasa riba dje...

Segun mi Hunneley mes a ekskluí su mes for di proyektonan ku por sali for di e músikonan di eks Qsign, dor di a pone e klóusula den su kontrakt ku Icons...

E klóusula ta bon bon, e ta duna bo mes komo artista e kredibilidat ku bo ta 100 % ku e proyekto di Icons...

Pero mester ta konsiente ku e sobrá músikonan por harma e ‘kos’ ora ku nan ke i te hasta sin tuma kontakto ku bo...

Moveshonnan farandulero lokal ta pone ku bo e posibilidat aki no por a keda ekskluí...

Papiando di Icons by Gio, e videoclip di ‘Wauw Effect’ a impreshoná mi...

Tremendo produkshon di Ryan Navarro i ku un mensahe bon kla...

Ata den tambú tambe tin un ‘vrum vrum’ ei...

Nos a sigui e programa di radio di kolega Kòrá Faneyte ayera nochi un ratu i a tuma nota ku tin basta malkontentu den e mundu di tambú pa aktitut di un lider di grupo di tambú ku ta fomentando rabia entre e gruponan di tambú...

Doña Mistica tabata skèrpi ayera nochi i a menshoná nòmber i indiká bon kla kiko a sosodé...

Akisha Albert a biaha ayera pa Thailand pa bai representá Kòrsou na e sertámen di Miss Universe...

‘Louie Louie’ ke uni su mes ku tur e bon deseonan pa Akisha den su partisipashon na Miss Universe...

Akisha tin e talento i beyesa pa por resaltá den e sertámen...

16 di desèmber nos lo ta testigu di su logronan den e sertámen...

Awe Ilan Chester ta yega Kòrsou pa su presentashon djabièrnè awor na PWFC...

Promoshon ta kanando zeta i nos tin e impreshon ku e konsierto aki lo ta un ‘sold out’...

Mañan ‘DEN E BEMBE’ lo tin mas detaye relashoná ku e yega i presentashon di Ilan Chester...

Nos tei move, te djabièrnè ku Dios ke !...