Un felis djabièrnè pa tur nos lektornan...

Nos a yega e djabièrnè di Ilan Chester, e djabièrnè di ‘Kings of Hits’, e djabièrnè di fin di luna ku un sin fin di aktividatnan rònt Kòrsou...

Awe nochi e leyenda venezolano di músika, Ilan Chester lo presentá den e sala multifunshonal di PWFC...

Abo ku tin bo karchi, wak pa bo tei foi tempran pa bo por disfrutá dje pre-show, un show di nos artistanan hóben interpretando klásikonan di dékada 80...

Otro dje aktividatnan awe nochi ku tin basta interes ta ‘Kings of Hits’, e fiesta kaminda komposishonnan eksitoso di Quincy Comenencia, Dwight Leoneta i Titi de Palm lo zona durante henter anochi ta pinta di bai bira un tremendo fiesta...

Ayera nochi nos tabata presente na e ensayo den sala di eksibishon di WTC i despues di skucha algun dje kantantenan mester bisa ku awe nochi ta hopi rekuerdo lo bai tin segun hit ta zona, un tras di otro...

Mañan djasabra i djadumingu Koro Sta. Famia ta presentá nan show di Fin di aña ‘Un Pasku yen di Amor’ na Banko Sentral...

Koro Sta. Famia lo ta presentando kansionnan popular di Pasku...

Karchinan pa e konsierto di Koro Sta. Famia ta optenibel serka e miembronan di koro Sta. Famia...

Agrupashon musikal ONE ayera a pone otro kansion promoshonal riba merkado...

‘Hopi Gibi’ ta un kolekshon di algun dje kansionnan eksitoso di Gibi Doran ku a keda produsí den un medley...

‘Hopi Gibi’ a risibí atenshon mesora i fanátikonan di Gibi Doran en general tabatin masha bon reakshon mes riba e piesa...

ONE ta pendiente pa saka mas produkshon musikal promé ku fin di aña...

‘Louie Louie’ a tuma nota dje reakshon di Quinthony Thomasa i Quincy Amasia, ámbos a papia bon kla i ba ripará mesora despues di nan deklarashon a reina un silensio pa loke ta trata e tema...

E formashon musikal dediká na músika kubano, Los Compadres tei selebrá nan di 15 aniversario...

Glenn, Iko i sobra músikonan masha pabien...

Nan ta pendiente pa batisá na CD próksimamente...

‘Wauw Effect’ di Djuric Virginie huntu ku Icons by Gio su videoclip riba YouTube a bula 25 mil views kaba i ta sigui hala atenshon...

Un biaha mas un bon produkshon di Ryan Navarro ku a produsí e videoclip...

E importansia di videoclip ta algu masha importante pa artistanan, e promoshon via di medionan sosial ta masha importante i bo mester traha riba e produkshon di un videoclip si bo ke alargá bida di bo produkshon musikal...

Bon, nos tei move, e wikènt aki sali i dibertí, duna sosten na nos artistanan lokal unda ku nan ta presentando...

Djaluna nos tei bèk ku otro edishon di ‘Louie Louie’...