Un felis djabièrnè pa tur e lektornan di ‘Louie Louie’...

Nos representante na Miss Universe, Akisha Albert ta sigui impreshoná...

Mi ta basta optimista ku Akisha lo kousa un impakto positivo ku su partisipashon na e sertámen di beyesa...

Sertámennan manera Miss Universe durante e último añanan a kuminsá kita nan focus for di e solamente e bunitesa di e dama, pero ta wak tambe e nivel intelektual i loke ku e partisipante a hasi den su bida ku a kousa impakto riba otronan...

E manera sigur di presentá di Akisha ta un punto masha fuerte i ta great pa mira kon Kòrsou ta bibando tur dia ku kada evento ku ta tumando lugá ...

E reportahenan di Gionel Virginie for di Thailanda tambe ta pèrkurá pa tur hende keda na altura di e último akontesimentunan...

Den awe pa mañan si bo ta un dje faboritonan e organisashon ta kuminsá tuma entre otro medidanan èkstra di seguridat pa e grupo di partisipantenan i esaki ta indikashon mesora ku bo a skor bon i ta un dje posibel faboritonan pa e organisashon di Miss Universe...

Akisha sin duda a impreshoná i ta un representante di Kòrsou ku sigur Ofisina di Turismo i Gobièrnu mester usa komo un di nos embahadornan di Pais...

Djadumingu te dia! Eksito na Akisha i manera ta e deseo di nos tur aki na Kòrsou... buta kos pasa !...

ONE, e agrupashon musikal enkabesá pa Dibo Doran a saka nan promé disko kompakto...

Ounke tur turbulensia, e banda a sigui traha i produsí material nobo i awor a pone riba merkado un CD ku nos tin sigur lo mester risibié sosten di su fanátikonan...

Kòrda bon, kumpra e original i duna sosten na nos artistanan lokal...

Na Merka Robin Thicke i Pharell Williams mester paga kasi 5 mion pa derechi di outor relashoná ku un kansion ku ta praktikamente idéntiko pa loke ta trata letra na un piesa di Marvin Gaye...

Famianan a entamá kaso i awor ta pendiente pa kobra un bon boka for di e kaso, aserka nan ta keda ku derechi pa sigui kobra derechi di outor...

Mayan nos, e famia di EXTRA huntu ku famianan ta hiba nos kolega Guiseppe na su último lugá di sosiegu...

Un morto ku a kai di forma sorpresivo i ku ta laga bu keda sorprendé kon bida por tin un buèlta asina...

Ami ku Guiseppe konosé otro fo’i promé ku mi a kuminsá traha na EXTRA i manera tur hende ta bisa mi tambe ta konfirmá, un persona super amabel ku ami nunka, ni aki na EXTRA no a mir’é rabia...

Nos joke nan lat den anochi lo bai hasi falta sigur...

Guiseppe, sosegá na Pas, bo sonrisa lo keda semper komo un rekuerdo ...

Nos ta despedí, djaluna nos tei bèk ku otro edishon di ‘Louie Louie’...