Un bon siman, e último di 2018 i promé siman di 2019...

E loke ku a keda bisá for di kuminsamentu di aña i ku na vários okashon a resultá realidat den e último siman di 2018 a bolbe bira tópiko di kombersashon...

E situashon di farándula di Kòrsou...

‘Vader’ Volk su komentario riba facebook a pèrkurá pa masha hopi reakshon mes i un kos ku sigur a keda konfirmá ta e echo ku hubentut a skohe pa e género di R&B i Hip Hop...

Un pabien pa Chucho Albertina i su tim ku otro eksitoso konsierto di ‘Broederliefde’...

Tantu esnan paden komo esnan pafó sintá na Handelskade i bisindario a disfrutá dje presentashon di ‘Broederliefde’...

Otro dje eventonan ku a hala bon públiko tabata “Juni & the Bolero Legends” den Riffort Village...

Na Brakkeput Mei Mei, e konsierto di fin di aña di Randal Corsen Orchestra tambe a bai super bon, tantu djabièrnè komo djasabra nan a sa di hala un kantidat grandi di públiko...

Karnaval 2019 ta tin tur ingrediente di ta un eksitoso, ta na JAG pa pèrkurá pa hasi bon uso di tur su rekursonan pa esaki resultá un éksito...

Bon komunikashon i sero na eksklusividat lo pone ku e organisashon lo risibí sosten di tur medio di komunikashon...

Mi ta kombensí ku JAG lo traha riba esaki ...

Tanten tambú ta zonando na radio ya algun tumbero a kuminsá traha riba nan tumba pa Festival di Tumba 2019...

Den kombersashon ku Feco el a indiká ku den e promé siman di 2019 lo reuní ku miembronan pa dje forma ei den di 2 siman di yanüari tene konferensia di prensa relashoná ku Festival di Tumba 2019...

Feco den e kombersashon tabata mustra den ekspektativa pa e festival, esaki tumando na konsiderashon ku lo e ta kla mas lihé ku su partnernan pa spònser e festival di 2019...

Fin di 2018 ta yegando...

Pone bo metanan ku bo ke logra den 2019 i traha duru pa bo logra esakinan, no tin nada mas great ora bo sinta i wak patras i bo tuma nota ku ba logra algun dje metanan òf tin biaha te hasta tur...

Pa loke ta trabou, ban sigui traha pa adelanto di nos Pais, Kòrsou meresé mihó !...

Kòrsou tin tur potensial pa sigui krese, ta na nos pa uni i traha huntu pa adelanto di nos Pais...

Huntu nos ta logra esaki !...

Un felis 2019 pa tur e lektornan di ‘Louie Louie’, mi ta spera ku 2019 lo trese un monton di kos bon so pa nos tur !...

Nos próksimo edishon di Louie Louie lo ta djabièrnè, 4 di yanüari 2019...