Un felis djabièrnè pa tur e lektornan di ‘Louie Louie’...

Nos a yega e promé wikènt di 2019 i pa e wikènt aki apart di apertura di Karnaval tin diferente aktividat ku manera nos ta mira lo bai hala un kantidat grandi di públiko...

Tabula Rasa i tambe e konsierto di ‘Meisjes Blijven Meisjes’ tin tur indikashon ku ta bai hala un bon públiko...

Ayera na e tereno kaminda Tabula Rasa ta bai tuma lugá tabatin splikashon amplio di e festival i tur detaye a keda kompartí...

E organisadónan a te hasta pèrkurá pa tin transporte pa hiba e públiko na e sitio dje evento i trese nan bèk na tres punto stratégiko bèk...

Ma tuma nota dje video riba facebook kaminda públiko ta kanta un popular kansion dje konosido kantante DEZ, esaki ta un ehèmpel kon públiko mester sostené nos artistanan lokal...

Great, hopi Great mes !...

Awe tardi/ anochi 6 or di apertura di Karnaval Hubenil ku e jump up saliendo for di Samira Shopping Center pa Sambil...

Sali kas bin para kantu di kaya i apoyá nos hóbennan karnavalista den e promé edishon di apertura di karnaval spesialmente pa e hubentut...

Awe e músikonan di Kassav ta yega Kòrsou, un parti 6 or riba e buelo di KLM i e otro parti 8 or di anochi ku e buelo for di St. Maarten...

Manera ta konosí e formashon musikal tin músikonan ku ta biba na Fransia i algun na e isla Martinique...

Definitivamente e konsierto di Kassav a pasa pa Kleine Werf...

Ma komprondé ku ta pa motibu ku tabata premirá áwaseru den e dianan aki ku a disidí di sali for di Stadion di Rif i bai Kleine Werf...

Papiando di apertura di Karnaval, e diferensia entre e kantidat di partisipantenan na Karnaval di Kòrsou i esun di Aruba ta un diferensia di dia ku anochi...

Nos Gran Marcha anualmente ta konta ku partisipashon di mas o ménos 3500 partisipante...

Na Aruba mañan anochi tin nan tradishonal ‘Fakkel Optocht’ òf mihó bisá e Parada di Flambeu...

Tin 12 grupo partisipando na e parada aki i huntu nan tin 11.000 partisipante...

Si manera bo a lesa, 11 mil partisipante pa un ‘jump up’ loke ta ekivalente na mas ku 3 biaha e kantidat di partisipantenan di nos Gran Marcha...

Ounke kuantu grupo bin aserka e aña aki pa nos Gran Marcha e kantidat di partisipantenan no ta subi, paso ta e mesun hendenan ta move di un grupo pa otro...

Ofertanan di deskuento riba retnan sosial ta na òrdu di dia, loke ta indikashon ku tin gruponan ku no a yega e kantidat di partisipantenan ku nan ta deseá...

Ban spera ku tur grupo ta logra esaki, paso ta lider di un grupo tin su riesgonan kuné i sigur niun hende ke terminá un temporada di Karnaval ku debe...

Felis wikènt, nos ta topa na un dje aktividatnan ku tin e wikènt aki...