Un bon siman pa tur nos lektornan...

Temporada di Karnaval a kuminsá i pueblo ta kla pa gosa!...

Ban kuminsá ku djabièrnè, e apertura hubenil...

E promé edishon dje evento di apertura hubenil a tuma lugá, ounke gruponan di Karnaval Hubenil a bria ku nan ousensia...

Ta di lamentá ku esaki a sosodé, si e komunikashon tabata bon, kada grupo lo por a manda sikiera 10 partisipante...

Nos no sa unda e komunikashon a faya òf si e motibu tabata e gastunan ku tin mara na partisipashon dje muchanan na e evento...

E situashon aki mester wòrdu klara pa JAG, pa dje forma ei nan sa si ta faktibel pa organisá e evento pa un di 2 okashon...

Ma komprondé ku tin malkontentu pa loke ta trata MC pa eventonan di Karnaval, un moveshon di último ora a pone ku JAG a laga un MC na kaya...

Ma komprondé ku tur kos tabata akordá, pero ora a yega momentu pa konfirmá, a bisa e shon ku no tin mester di su servisio mas...

E apertura di Carnival Village a bai hopi bon, loke ta di lamentá ta e echo ku barnan no tabata bon prepará pa e evento...

Serbes i diferente otro produkto a kaba poniendo ku e bar a pèrdè di gana...

Si bo sa adelantá ku ta riba 4 mil hende lo asistí na e evento, nunka, pero nunka bo bar tin mag di falta bibida, paso bo sa ku e hendenan ta bin pa bebe...

Tin yen splikashon pa e motibunan dikon a move e evento pa Kleine Werf, pero laga esei pa 8 dia...

Nos bandanan lokal a duna bon presentashon, pero mester rekonosé ku Gentz tabata esun ku mihó preparashon i ku e repertorio bon hinka den otro pa e konsierto...

Paul Welvaart ta keda e ‘Rei di Kaya’, djasabra su presentashon di O’Vega ela bolbe konfirmá ku su potpuri di kansion di karnaval ta sumamente gusta...

E transmishon di Apertura di Carnival Village di EXTRA kombiná ku TeleCuracao a resultá un éksito kompletu...

Ámbos medionan di komunikashon a usa nan plataforma digital pa pasa e transmishon i e reakshon tabata bárbaro...

Mayan ‘DEN E BEMBE’ lo duna un splikashon amplio riba esaki...

Echo ta ku e transmishon a pèrkurá pa un públiko grandi na Ulanda por a sigui esaki i reakshon for di tur skina di Ulanda tabata masha positivo...

Anto esaki sin hasi menshon di e kantidat grandi di hendenan ku a sigui e transmishon na Kòrsou mes...

EXTRA ta sigui traha riba proyektonan oudiovisual via di su plataformanan digital...

Keda pendiente pa e siguiente transmishon ku lo keda anunsiá próksimamente...

Apertura i inisio dje selebrashon di 50 aniversario di Karnaval di Bándabou a tuma lugá ayera tardi...

Bon asistensia di públiko na Barber pa disfrutá dje animashon musikal di diferente banda...

Nos tei move, e siman aki tin reunion di AMAK riba Festival di Tumba pa despues tene e rueda di prensa relashoná ku e evento...

Nos ta topa, te djárason ku Dios ke!...