Un felis djabièrnè pa tur nos lektornan...

Djaluna awor AMAK  ta tene su tradishonal konferensia di prensa pa Festival di Tumba 2019...

Tin espektativa pa e edishon 49 di Festival di Tumba, basta interes i na Ulanda e interes ta haltu, pero ta pendiente pa wak ta kon ta hasi sigui e transmishon sigur dje dianan preliminar ...

Ayera nochi ma mira un potrèt dje kombinashon di Farley Lourens i Maarten Schakel riba facebook...

Biaha pasá, dia dje ‘Stoba’, nan 2 a traha huntu komo kompositor i kantante...

Awor ta kestion di warda dia 27 pa konfirmá Maarten su partisipashon, paso ayera nochi e tabata ‘mondje dicht’...

Bryan Goilo, konosí komo ‘King B’, e gai dje ‘Webu’ i ‘Lenga’ tambe ta pendiente pa su partisipashon na e festival, e ta trahando huntu ku Cuco Cruz...

Great pa mira djárason anochi kon públiko lokal a asistí na e estreno di ‘Bon Bini Holland’ aki na Kòrsou...

E resepshon na yegada di Jandino tabata un di apresiá...

Jandino su fanátikonan ta for dje mucha chikí te esnan mas grandi na edat...

Mi mes a keda pa e wikènt aki bai wak e pelíkula, pero mester rekonosé ku e ta rumbo pa kibra un rèkòrt pa loke ta trata asistensia na un pelíkula produsí na Ulanda...

Na Ulanda nan a surpasá mei mion di hende ku a bai wak e pelíkula...

Mañan djasabra tin e elekshon di Reina, Prens i Pancho Brindo na Bándabou...

E elekshon ta tuma lugá na Sporthal na Barber i ta kuminsá pa 8 or di anochi. Entrada ta 10 florin...

Djadumingu ta fecha pa e elekshon di Reina, Prens i Pancho Talento Adulto...

Kleine Werf ta sitio dje evento di Talento i esaki ta kuminsá pa 7 or di anochi...

Tanten nos ta trahando e kolumna djawe nos ta skuchando tumbanan di añanan anterior...

Nos tumba tin super dushi ambiente...

Kompositor i areglistanan ta maestro di pone ambiente den tumbanan...

Tin algun ku ta simplemente master den traha mambonan ku ta trese ‘bonche’, pone ku bo mester move...

E aña aki atrobe nos lo eksperensia diferente banda ku sea tin mas ku 1 repeater òf tin vershon di 2 banda...

Ma komprondé di un konosido kompania di zonido ku tin tur spiker reserva pa diferente gruponan di Karnaval, no a sobra nada mas!, asina nan a bisa mi...

Ta e momentu di aña tambe pa wak ken ta zona mas mihó den kaya...

Nos mester bini ku un kompetensia asina i saka un ganadó despues di Gran Marcha...

Bandanan sigur lo ta kla pa kompetí, pasó zona bon den kaya ta e meta di kualke banda...

Tin músiko ku por bira te hasta malu ora ku por ehèmpel generator kai afó i ku nan ta pasando den marcha sin por toka...

Nos tei move, disfrutá di bo wikènt, nos ta topa djaluna...

Pa djaluna awor e kolumna di ‘Louie Louie’ ta start...