Un felis djárason pa tur nos lektornan...

Ensayonan pa Festival di Tumba a kuminsá...

Tin banda ku a start fo’i tempran pa dje forma ei por hasi uso di e supladónan for di awor, ya despues ora ku tempu pèrta ta djis repasá ku nan...

Ma tuma nota ku gruponan ta riba oferta pa djòin gruponan di karnaval ketu bai...

Esei ta un indikashon ku gruponan no a risibí e rèspòns ku nan a spera di miembronan òf tin masha hopi hende ku no a disidí ainda...

Ayera tardi Fundashon Alelimo a organisá un rueda di prensa kaminda a laga e hóbennan skohe nan órden di presentashon ku e banda ku nan ta partisipando...

Festival di Tumba Hubenil e aña aki ta riba djasabra, pues mayornan bai ku e muchanan pa nan sostené nan amigunan partisipante...

Nos artistanan chikí meresé bo sosten!...

Un saludo pa e damitanan di Venequip ku ayera tardi tabata masha servisial...

Sergio bo tim ta tòp!...

By the way, great pa tuma nota ku Venequip e representante lokal di e marka Caterpillar ta duna nan sosten na Karnaval...

Sergio ta Karnaval den e sentido mas amplio di palabra...

Su kuna ta bin for di e grupo di Karnaval T’aki Tin, pues Sergio sa di kos bon so!...

Ma gusta e lema di AMAK pa e di 49 edishon di Festival di Tumba 2019...

‘Un palanka Artístiko Históriko’...

Gabriello ‘Cuco’ Cruz ta risibiendo bon atenshon di parti di medionan di komunikashon i riba retnan sosial e mes ta promoviendo su mes pa e echo ku e ta bai partisipá pa di 33 biaha konsekutivo na Festival di Tumba...

Harry Zimmerman dfm ta e úniko tumbero ku tin e kantidat di 33 partisipashon kontinuo, pues Cuco ta empatá e aña aki ku e legendario Harry Zim Zam Zoem...

Cuco tin vários tumba ku a resultá un éksito, un di esnan ku ‘Louie Louie’ a gusta ta ‘Mi Zjilea’, tremendo tumba ku un super areglo di Ravello Antoin...

Marvin ‘Pickachu’ Snijders huntu ku Mai Yeta a produsí e tambú ‘ E flor a pega’ i mesora a produsí un videoclip di esaki...

Germain Jansen, alias ‘Mai Yeta’ ta sigui traha di forma kómiko i positivo ku e personahe di ‘Mai Yeta’ ...

Nos a pasa mitar di yanüari i ta pendiente pa Curacao North Sea Jazz anunsiá e promé grupo di artistanan pa e festival dje aña aki...

Ekspektativanan ta haltu, ma komprondé ku a benta liña formal riba 2 artista grandi ...

Konfirmashon di 1 di nan so ta sufisiente pa lanta un ‘hype’ pa e festival, lokura total lo ta si ámbos artista konfirmá nan partisipashon na e edishon di CNSJ dje aña aki...

Un saludo pa Niata i Juni Aniceta, tremendo ambiente ayera den e bleki saldinchi...

Nos tei tira un tek, djabièrnè nos tei bèk!...