Un bon siman pa tur nos lektornan...

Awe nos ta start ku ‘Karnaval 2019 ku Louie Louie’...

E kolumna karnavalesko kaminda diariamente nos lo kompartí informashon ku nos lektornan pa dje forma ei bo ta debidamente informá pa loke ta trata Karnaval di Kòrsou...

Ban kuminsá ku manda un pabien pa e tim di Fundashon Alelimo i Fundashon JAG ku a traha riba Festival di Tumba Hubenil 2019...

Bon organisashon i e públiko a haña un tremendo espektákulo pa mira i disfrutá di dje...

Nos hóbennan tumbero a duna un tremendo presentashon i bo ta mira ku e nivel di tantu komposishon, areglo i interpretashon a subi...

E grupo di kompositor i areglistanan ku e aña aki a duna nan kontribushon na e festival tabata tremendo...

E tres bandanan Hype, Dolce i YMG a duna tremendo kompañamentu musikal, sin lubidá e tim di supladónan ku tur aña ta duna nan sosten na e festival...

Ounke durante henter siman tabatin deliberashon tumando lugá kon lo a transmití e festival via di televishon, finalmente ámbos planta di televishon a transmití e festival ...

Pabien na Sontje Mercelina nos Rei di Tumba Hubenil 2019 i na tur e finalistanan dje festival...

Pe siman aki ensayonan di tumba ta kontinuá, e proseso di harma e tumbanan ku piano, bas i perkushon ta kontinuá...

Pa e supladónan lokal ensayo a inisiá sigur serka e bandanan ku ta fia músiko for di otro bandanan fiho ku mas lat den e siman aki ta start ku ensayo ku brass...

Ma komprondé ku mayoria dje músikonan supladó ku ta bini for di Venezuela lo kuminsá yega otro siman djaluna...

Ta e momentu ei ku ensayonan ta kue forma i ku lo bo tin chèns di skucha e piesa kompletu ...

Manera tur aña rumornan ta kuminsá sirkulá i lo bo mester pone bo mes na prim pa move di un ensayo bai otro manera algun fanátiko/ analista di tumba ta hasi...

Gruponan di Karnaval tambe ta den ful swing ku preparashon...

E gruponan ku sigur obra di man ta e parti importante di nan trahe i of handpiece ta trahando e dianan aki duru...

Ma tuma nota ku tin algun grupo ku ya a kuminsá hasi entrega di nan trahe di Karnaval...

Bromamentu ku faltando 6 siman pa Gran Marcha i ku nan ta kla ta un stunt publisitario pa e gruponan...

Tin grupo ku a baha na kantidat di miembro i otronan nobo ku a sali ku a kanta ‘sold out’ na momentu ku nan a yega 250 partisipante...

E parti ei ta masha importante, bo mester por hèndel e kantidat di partisipante...

Servisio di bar i kushina ta masha importante sin lubidá kon bo ta atendé ku trahe, paso tin grupo ku durante dje último 2 añanan aki a haña nan mes den bastante problema, paso simplemente trahenan no a bini kla i e partisipantenan ta habri djadumingu di Gran Marcha sin nan trahe...

Den e siman aki AMAK ta bai tene nan rueda  di prensa kaminda nan lo presentá nan partnernan pa e edishon # 49 di Festival di Tumba...

Músikonan ta entusiasmá pa partisipá i e organisashon ta trahando duru pa presentá otro tremendo edishon di nos Festival di Tumba...

Awe AMAK ta na Aruba pa nan tradishonal rueda di prensa relashoná ku Festival di Tumba...

Papiando ku Feco ma komprondé ku nan ta spera ku e aña aki lo tin mas fanátiko di Tumba ku lo por yega Kòrsou kompará ku aña pasa, esaki debí na falta di avion pa transportá...

Awor ku Divi Divi i EZ air bulando e kantidat di stul disponibel ta bira mas tantu i kontribuí ku mas hende ta bin for di Aruba i Boneiru pa wak e festival...

Nos tei move, e promé edishon di ‘Karnaval 2019 ku Louie Louie’ ta kla, mayan nos tei bek !...