Un felis djamars na tur nos lektornan...

Ayera nochi tempran nos a asistí na e homenahe chikí ku e agrupashon musikal ONE a duna na nos Tata di Tumba, Anselmus ‘Boy’ Dap...

Ta di apresiá i sigur pueblo di Kòrsou mester apresiá e tremendo inisiativa ku Dibo Doran a bin kuné pa traha un medley dje 10 tumbanan ganadó di Boy Dap...

E kombinashon di Dibo i Randal ta bolbe skor ku otro tremendo produkshon musikal ku sigur mester zona, pa manera Dibo a indiká, hubentut di Kòrsou sera konosí ku e gran baluarte musikal ku ta Boy Dap...

Ta masha great mes pa bo tende kon agradesido e famia ta...

Awe nos no a produsí e palabranan ku sra. Frida van de Marl – Dap, ruman muhé di Boy Dap a bisa ayera na final dje homenahe...

Nos ta pendiente pa awe traha riba esaki pa mañan boso por lesa kon agradesido e komo persona i ruman di Boy Dap ta...

Un Boy poko na palabra tabata masha kontentu i manera Anralice a indiká a bira te asta emoshonal ora ku el a tende ‘Biba Boy’, e piesa dediká na dje pa promé biaha...

E loke ku Randal a enfatisá ku mester balorá loke nos ta’tin den pasado paso e ta e esensial pa nos, paso e ta fundeshi di loke nos tin awe ta di gran importansia...

Mi ta kòrda mesora riba e proyekto musikal di AMAK ‘Nos Rais Musikal’, e medleynan ku Gentz a produsí di Don Macario Prudencia dfm i esun di Doble R...

E produkshonnan musikal di Randal kaminda el a produsí vários vershon di Jazz di nos piesanan di antaño i por último un ‘Plegaria’ di Chin Behilia ku a keda reprodusí pa  Izaline i resientemente pa Yentje Silvanie...

Nos mester duna balor na nos artistanan lokal...

Ban bèk pa Karnaval, awe tardi na kas di Boy Dap a bolbe lanta e diskushon riba e situashon di Jan Noorduynweg...

Ta parse ku e situashon ta kontrolabel i ku Polis próksimamente lo duna indikashon kon trailer di e diferente gruponan lo tin ku kore pa dje forma ei evitá molèster riba Jan Noorduynweg...

Sedenan di gruponan di Karnaval ta den ful swing...

Obra di man ta na òrdu di dia, tin ku manera nos a indiká ayera a kuminsá hasi entrega di trahe i otronan ku te ainda porta ta habri pa miembronan nobo bin registrá pa partisipá...

Ma tuma nota te hasta di grupo ku lo tin un delegashon ku ta biaha pa Boneiru pa einan laga miembronan kohe midí i hasi pago pa nan partisipashon den Gran Marcha na Kòrsou ta garantisá...

Awe ta fecha pa e reunion entre AGKK i AMAK relashoná ku tokamentu di tumba durante di marchanan di Karnaval...

Mi ke komprondé e punto di AMAK, pero nan komo organisashon tambe mester ta konsiente ku e miembronan di grupo ku ta partisipá den Karnaval tambe tin derechi di eksigí loke nan ke pa zona durante marcha pa nan baila...

Lo ta interesante pa sa kiko e desishon final riba esaki lo ta...

TDS ta pendiente pa harma su Lanthùis djadumingu awor den Festival Center...

E tema dje aña aki tin su preguntanan riba dje, pero nos ta kombensí ku e idea di Don Manuel na final tur hende lo komprondé e meta tras di dje...

Diferente ‘Tim’ a keda lantá den e trayekto pa partisipá na Festival di Tumba...

No solamente tim di bandanan pero tambe kompositor i areglistanan a traha riba nan tim pa 2019...

Un di esnan ku nos a tuma nota di dje ku tin su tim di 2019 ta Gregory Colina...

Ma komprondé ku Gregory lo tin por lo ménos 8 komposishon i sigur 10 areglo si no ta mas...

Tin algun banda ku ta ensayando porta sera i ku ke warda te wikènt pa nan habri porta i laga públiko bin skucha loke ku e kantantenan tei presentá e aña aki...

Otronan ta porta habri fo’i promé dia, paso e bar na e sitio di ensayo mester drai...

Fo’i ora fanátiko bin wak, nan ta kome i bebe, esei ta trese bida !...

E wikènt aki tin elekshon di embahadornan di Bándabou...

Ma komprondé ku tin un grupo ku a bai studia e fórmula ku lo ke implementá pa yega na e premiashon di Grupo di Aña di Karnaval...

Segun nan calculator nan tin chèns di pèrdè punto si e fórmula no wòrdu bon ehekutá...

Mi ta premirá ku lo mester bolbe tene un reunion pa profesor di matemátika bin duna un splikashon dje fórmula pa Grupo di Aña...

Henny, buska algun ‘Abacus’, mihó konosí komo ‘Telraam’ pa bo siguiente reunion di AGKK...

Bon nos tei move, basta trabou tin na kaminda, mester sigui move...

Te mañan ku Dios ke!...